(Казан, 9 ноябрь, «Татар-информ»). Бүгенге көндә Россиядә коронавирустан вакцинаның беренче компоненты белән 62 млн кеше прививка ясаткан. Бу хакта РФ Министрлар Кабинетының Covid-19га каршы көрәш буенча координация советы утырышында РФ Сәламәтлек саклау министры Михаил Мурашко хәбәр итте. «Эшләми торган көннәр чорында вакцинация темплары яхшы сакланган. Эшләмәгән көннәрдә 3,7 млн кеше прививка ясаткан», - диде министр. Вакцинацияләүнең чагыштырма авырлыгы 100 мең кешегә 400 кеше тәшкил итә. Вакцинация темплары буенча лидер төбәкләр арасында Калмыкия, Төмән, Пенза, Липецк һәм Киров өлкәләре, Чукотка һәм Ханты-Манси автоном округлары һәм Приморье крае бар. Covid-19га каршы массакүләм прививка кампаниясе Россия төбәкләрендә быел 18 гыйнварда башланды. Хәзер төбәкләр, инфекция таралуны туктату өчен, вакцинация темпларын арттырырга тырыша. Искәртеп узабыз, эпидемиологик вазгыять начараюы сәбәпле, Россия Президенты Владимир Путин 30 октябрьдән 7 ноябрьгә кадәр ял көннәре дип игълан итте. Төбәк хакимиятләре режимны агымдагы эпидемиологик хәлдән чыгып мөстәкыйль рәвештә озайтырга мөмкин. Элегрәк хәбәр ителгәнчә, бу карарны Россиянең биш субъекты кабул иткән.
