Депрессиядә булган хатын балаларын буып ташлаган

Пермь өлкәсендәге Кудымкар шәһәрендә ике баланы үтергәннәр. Бу җинаятьне балаларның анасы кылган дип шикләнәләр. Ул үз-үзенә кул салырга маташкан. Биредә яшәүчеләр хәбәр иткәнчә, хатын бала тапканнан соң, депрессиядә булган. Бу турыда «АиФ» хәбәр итте.

Тикшерү версиясе буенча, 23 гыйнварда иртәнге дүрт бала анасы ике баласын үтерә. Бер яшьтән өч яшькә кадәрге ике баланы буылган килеш тапканнар. Гаиләдәге өлкәнрәк ике бала бу вакытта мәктәптә булган, диелгән бу хәбәрдә.

«Комсомольская правда» хәбәр иткәнчә, Анна исемле бу хатынга 32 яшь. Мәрхүм балаларның берсенә бер, икенчесенә биш яшь. «КП» мәгълүматы буенча, хәзерге вакытта 8 һәм 2 яшьлек ике бала әтиләре белән. Фаҗига Михаил эштә вакытта килеп чыга. Хәбәрләрне ишеткәч, ул тиз генә өйгә кайта.

Анна белән Михаил социаль челтәрдә уртак сәхифә ачкан булган. Анда хатынның фотолары юк, бары тик Михаил гына бар.

«Анна — белеме буенча педагог, ләкин ул мәктәптә беркайчан да эшләмәгән бугай», — дип сөйли бер таныш хатыны.

Анна чиркәүгә дә йөргән, Аллага ышанган.«Ходай күпме бирә, шулкадәр бала табам», — дип әйтә торган булган ул.

Бу гаилә яхшылар рәтендә була, бернинди хисапта да тормый.

Тикшерү комитеты «үтерү» маддәсе буенча җинаять эше ачкан. Пермь өлкәсе прокуроры кушуы буенча тикшерү оештырылган. Урынга комиссия барган.