Рут ясңатан потрат ханшиӆысат, юрӆаӆ артаӆысат
Тамхатӆ, курк тыӆащ 21-мет хатаӆан, Пулңават вошаң хоятат Национальной нэпек ӆуңатты хотан рут ясңатан «Язык наш веками отточен» диктант ханшсат. Шимӆаң мир хоятат рут ясңата постаман уӆӆа.
Округ ӆоватан няӆъяң пеӆа ӆапат хар ӆарпитыман уса. Диктант ханшты питщаты еӆпийн, кашң хоята ID-номераң нэпек вуты мосас. Кашң хоят ӆув уятты ясңаӆ па потрапсайӆ щиран онлайн-трансляцияя пиӆтащты верытас. Ур ёх мир нюраман па унтан уӆты хоятӆаӆ потрапсайн ханшсат. Ханты мир ёх: Ӆорвош, Кев сыӆ мув па Хаӆэват Пелак потрапсаятан. Селькупат тазовской мирэӆ диалектан, саранат па ижемской. Кашң мир щёскем ханшас.
Ур ясаңан «Няръяна Ңэрм» газета куща Марина Яр, ханты ясаңан «Ӆух Авт» газета куща Аллина Яковлева, саран ясаңан Ямальской многопрофильной колледжан няврэмат рут ясңа утаӆтыты нэ Нина Егерь потрат ӆуңатсат. Там хоятӆув тумпийн, ашкуӆаятан па колледжан рут ясаң пиӆан рупитты нэңат па ёхат Тарко-Сале, Муравленко, Аксарка эӆты па пиӆтащисат.
Татьяна Енова па Елена Шульгина. Хор: Альбина Тырлина.
Еӆпи таӆатан ханты ясаңан «Ворңа хатӆ» эӆты потар ус, «Куккук» монщ ӆуңтыӆыса. Там пуш Владимир Егорович Енов ӆуңтар щира понам «Ӆуй паӆаткем кат похлэңки, паң паӆаткем кат похлэңки» нэмаң йис потар ханшсат. Ханты ясаңан хошты па моштаты хоятата кен ус. Ясаңӆаӆ хоӆ оша пайтсаӆӆаӆ, мосты щиран иса ханшсаӆӆаӆ.
Рупатайт вантты ураңан, рут ясаң шеңк яма уятты па ханшапса щиран моштаты, хоятат экспертной группая акатсайт. Ай кер тыӆащ 30-мет хатаӆан 2023-мет таӆан, хой хоты ханшас, Овс мув шимӆаң мир хоятат верат туңматты щиран уӆты ЯНАО Департамент па Национальной библиотека Ямала сайтата ӆоңтыты верытӆат. Кашң хоят сертификат ёша паятаӆ.
Ӆапат таӆа йис, хоты Ямал ӆоватан тамащ ун рупата кашң таӆ верыӆыӆа. 2022-мет таӆан 815 хоят 13 муниципалитет эӆты пиӆтащийс: ур ясаңан — 532, ханты ясаңан — 168, селькуп ясаңан — 77, саран ясаңан — 38 хоят.