Район хастаханәсендә онлайн киңәшләшеп ясалган операциядән 16 яшьлек кыз үлгән
16 яшьлек Милена Мөхәммәтҗанованың эче авыртуына зарланган. Хастаханәдә аңа «Булгалый, бетәр», – дигәннәр.
Бераздан кызның эчендә кан китә. Миленага операцияне тәҗрибәсе булмаган реаниматолог Максим Конанеров ясый. Хирург квалификациясен күтәрергә киткән була. Ул хезмәттәшләре белән онлайн киңәшләшә, хастаханәдә донор каны запасын игътибарга алмый. Ә хастаханәнең баш табибы Рафис Вафин өстәмә хирург та билгеләмәгән була. 2018 елның декабрендә кыз үлә.
Тикшерү эше башлана, гаеплеләр табыла. Бүген, 3 июльдә, Татарстан Югары суды хастаханәнең баш табибы гаебе аркасында үлгән 16 яшьлек кызның әти-әнисенә 4,2 миллион сум түләү турында карар чыгарды.
«Юраптека» телеграм каналы язуына караганда, компенсация күләмен ике тапкырга арттырганнар. Яңа Чишмә районы үзәк район хастаханәсе кызның әнисе Антонина һәм әтисе Илдар Мөхәммәтҗановка башта берәр млн сум түләргә тиеш булган.
Мораль зыяннан тыш, хастаханәдән матди зыян өчен гаилә 259 мең сум алачак.
2022 елның сентябрендә Конанеров һәм Вафин шартлы рәвештә 2 елга хөкем ителгән һәм аларга бер ел сәламәтлек саклау өлкәсендә эшләүне тыйганнар.
Эчендә кан китү аркасында кыз 2,5 литр канын югалткан. Хокук саклау органнары вәкилләре версиясе буенча, анестезиолог-реаниматолог Максим Конанеров хастаханәдә кан һәм аның компонентларын запас белән тәэмин итсә, ә баш табиб Рафис Вафин хастаханәнең бердәнбер квалификацияле хирургына алмаш тапкан булса, кызны үлемен тырнагыннан йолкып алып калырга мөмкин булыр иде. «Реальное время» газетасы шундый фараз да язган булган.