Данир Сабиров «теща»сы турында: «17 ел бергә торабыз...»
Юмор остасы Данир Сабировның «теща»сы туган көнен бәйрәм итте. Шул уңайдан артист якын кешесен телеграм-каналында котлаган. Данир бер кызыклы факт та язган – алар инде 17 ел «теща»сы белән бергә гомер кичерәләр икән.
«Миләүшәмнең әнисе, минем «теща»каемның туган көне! Мәзәкләрдә «теща» явыз персонаж булып саналса да, безнең очракта алай түгел. Инде 17 ел бергә торабыз! Күп дусларымның исе китә: «Ничек «теща» белән яшәп була ул?» – диләр. «Теща»сыз яши алмаганга», – минәйтәм. Кызларымны тәрбияле иткәнең өчен зур рәхмәт сиңа, Әни! Исән-сау бул, яшәү дәртең сүрелмәсен», – дигән Данир.
Сүз уңаеннан, Данир Сабиров хатынының әнисен татарларга хас булганча «әби» дип түгел, ә «әни» дип йөртә.