Սա հերթական միակողմանի զիջումն է, որն իհարկե պետք է ներկայացվեր որպես ձեռքբերում, միակ ելք ու փրկություն. Դավիթ Կարապետյան
«Մեդիալաբի» հարցերին պատասխանում է միջազգայնագետ Դավիթ Կարապետյանը – Պարո՛ն Կարապետյան, Հայաստանն ու Ադրբեջանը պայմանավորվածություն են ձեռք բերել սկսել սահմանազատման ու սահմանագծման աշխատանքները Տավուշի մարզից։ Իշխանության ներկայացուցիչները սա համարում են ձեռքբերում, Նիկոլ Փաշինյանն էլ ընդգծում է, թե առաջին անգամ հաջողվել է սեղանի շուրջ համաձայնության գալ Ադրբեջանի հետ։ Ձեր գնահատմամբ՝ հիմա սկսվել է սահմանազատման ու սահմանագծման գործընթա՞ցը։ […]
The post Սա հերթական միակողմանի զիջումն է, որն իհարկե պետք է ներկայացվեր որպես ձեռքբերում, միակ ելք ու փրկություն. Դավիթ Կարապետյան first appeared on MediaLab Newsroom-Laboratory.
«Մեդիալաբի» հարցերին պատասխանում է միջազգայնագետ Դավիթ Կարապետյանը
– Պարո՛ն Կարապետյան, Հայաստանն ու Ադրբեջանը պայմանավորվածություն են ձեռք բերել սկսել սահմանազատման ու սահմանագծման աշխատանքները Տավուշի մարզից։ Իշխանության ներկայացուցիչները սա համարում են ձեռքբերում, Նիկոլ Փաշինյանն էլ ընդգծում է, թե առաջին անգամ հաջողվել է սեղանի շուրջ համաձայնության գալ Ադրբեջանի հետ։ Ձեր գնահատմամբ՝ հիմա սկսվել է սահմանազատման ու սահմանագծման գործընթա՞ցը։
– Այն, ինչ պետք է տեսնենք, ուղիղ ու գործնականում միակողմանի զիջում է։ Սա հերթական միակողմանի զիջումն է, հերթական նշաձողի իջեցումն է, որն իհարկե պետք է ներկայացվեր որպես ձեռքբերում, միակ ելք ու փրկություն։ Փաստացի տեսնում ենք, որ Ալիևն ինչ ասում է, Փաշինյանը խելոք կատարում է ու դա անում է ամենաստոր ձևով, այսինքն՝ սկզբում սպառնում է պատերազմով, հետո խոստանում է խաղաղություն ու առևտուր։
Եթե պաշտոնապես մենք հայտարարում ենք, որ 2,5 գյուղ ենք մենք տալիս, դրա դիմաց ստանում ենք, իրենց բառերով ասած, անվտանգային ռիսկերի նվազեցում, ի՞նչ է սա ենթադրում. որ այդ աշխատանքների ժամանակահատվածում մեր կողմի ներկայացուցիչներին չեն սպանի, չեն խոշտանգի, որովհետև այլ կերպ նման տխմար եզրույթը հնարավոր չէ մեկնաբանել։ Այս պարագայում Ադրբեջանը ստանում է տարածքներ, Հայաստանը՝ ոչինչ, Հայաստանը հանձնում է հողերն ու անգամ երաշխիքներ ձեռք չի բերում, ոչինչ ձեռք չի բերում։
Մինչև մայիսի 15-ը տարածքները հանձնվում են Ադրբեջանին, նորաստեղծ սահմաններում էլ կանգնում են սահմանապահ զորքեր, բնականաբար, այդ ամեն ինչը ցնծություն է առաջացնում Բաքվում: Այնտեղ արդեն տոնում են աննախադեպ հաղթանակը, փաստացի խոսում են, որ առանց մեկ կրակոցի վերադարձվեց 4 գյուղ, որ այդ հաղթանակների շղթան շարունակվում է։
Պետք է ընդգծեմ, որ սահմանի ցանկացած փոփոխության դեպքում այն պետք է Ազգային ժողով մտնի, հավանության արժանանա, վավերացվի, եթե ցանկացած նման գործողություն չի ձեռնարկվում, ապա ձևավորված ցանկացած հանձնաժողով անօրինական է։
– Այսինքն՝ հիմա անօրինական գործընթա՞ց է։
– Փաստացի ստացվում է, որ ի պաշտոնե ՀՀ ղեկավար կազմը ոչ ճիշտ իրավական ընթացակարգով կատարում է սխալ իրավական գործընթաց, որը հետագայում խնդիր է առաջացնելու մեզ համար։ Գուցե իրենք ուզում են այնպես անել, որ սկզբում ստորագրվեն հատուկ հայտարարություններ, ու դրանք նոր բերվեն յուրաքանչյուր երկրի խորհրդարան, ու ստորագրվի, դա հարցի մյուս կողմն է, բայց այս պահին այն, ինչին մենք ականատես ենք, պետական մակարդակով անօրինական գործարք է Ադրբեջանի ու Հայաստանի միջև։
– Պարո՛ն Կարապետյան, Տավուշի մարզի գյուղերի բնակիչները բողոքի ակցիա են կազմակերպել, որովհետև դեմ են այս գործընթացին, մինչև մայիսի 15-ը, ըստ ձեզ, ի՞նչ զարգացում կարող է լինել։
– Ցանկացած իրադարձություն կարող է տեղի ունենալ, որովհետև կարծես հանրության բողոքի ալիք է բարձրանում, տպավորություն է, որ գուցե հիմա մենք ականատես լինենք ժողովրդի ցասմանը, բայց ես ցավով եմ նշում, որ այս պահին մենք ապատիկ, թմբիրակոմֆորտային զոնայում ենք։ Հիմնական հարցի լուծումը Երևանում է՝ կառավարության շենքի դիմաց։
– Մինչև մայիսի 15-ը եթե հնարավոր չլինի կասեցնել այս գործընթացը, դրանից հետո հնարավո՞ր է լինելու ինչ-որ բան փոխել։
– Եթե չհաջողվի կասեցնել, մայիսի 15-ից հետո արձանագրելու ենք, որ հայկական զինուժը հետ է քաշվում իր վերահսկողության տակ գտնվող Բաղանիսի, Կիրանցի, Բերքաբերի հատվածներից: Ադրբեջանական վերահսկողությունը շարունակում է մնալ Բերքաբերի շուրջ 1000 քառակուսի հեկտար օկուպացված հողատարածքների վրա, Ադրբեջանը վերահսկողության տակ է պահում Մազամ ջրամբարը՝ եռանկյունի, որը Խորհրդային Հայաստանի մաս էր ու 90-ականներից առ այսօր Ադրբեջանի վերահսկողության տակ է: Խաթարվում է երրորդ բանակային կորպուսի առաջին պաշտպանական գիծը, տասնյակից ավելի հայկական դիրքեր, խրամատներ, խրամուղիներ, ռազմավարական նշանակության հսկայական տարածքներ անցնում են Ադրբեջանի վերահսկողության տակ ու հետագայում օգտագործվելու են մեր դեմ:
Կազմաքանդվելու է Տավուշի ողջ պաշտպանական, անվտանգային համակարգը, թշնամին ավելի հարմար դիրքավորվում է հայկական բնակավայրերի մոտ։ Հետո՝ թշնամու սահմանապահ զորքը Կիրանց-Բաղանիս հատվածում նստում է Թբիլիսի-Երևան միջպետական մայրուղու վրա, ու նաև Բաքուն ժամանակ է տվել հայկական կողմին, որ Կիրանցի կամրջից 200 մետր այն կողմ նոր կամուրջ կառուցի, որովհետև հետագայում այդ կամուրջը հանձնվելու է Ադրբեջանին։
– Պարո՛ն Կարապետյան, սա նման չէ՞ այն գործողություններին, որոնք կատարվեցին Արցախում նախքան Արցախի ամբողջական հայաթափումը։
– Իհարկե, լրիվ նույն գործողություններն են, սա Շուռնուխ-2, Աղավնո-2 օպերացիա է։
Քրիստինե Աղաբեկյան
MediaLab.am
The post Սա հերթական միակողմանի զիջումն է, որն իհարկե պետք է ներկայացվեր որպես ձեռքբերում, միակ ելք ու փրկություն. Դավիթ Կարապետյան first appeared on MediaLab Newsroom-Laboratory.