„უკრაინა არ ჩარეულა, არ ერევა და არ გეგმავს საქართველოს საშინაო საქმეებში ჩარევას“
უკრაინის საგარეო საქმეთა სამინისტრო საქართველოს უსაფრთხოების სამსახურის მიერ გავრცელებულ განცხადებას, სადაც ნათქვამია, რომ ოქტომბერ-დეკემბერში საქართველოში იგეგმება დესტაბილიზაციისა და სამოქალაქო არეულობის მოწყობა, გამოეხმაურა.
როგორც სუსის განცხადებაშია აღნიშნული, გეგმის ავტორთა შორის ასახელებენ საქართველოს ყოფილი შინაგან საქმეთა მინისტრის ვანო მერაბიშვილის მოადგილეს გიორგი ლორთქიფანიძეს, რომელიც ამჟამად უკრაინის სამხედრო დაზვერვის ხელმძღვანელის მოადგილეა; მის დაქვემდებარებაში მყოფი ქართული წარმოშობის მქონე პირებს, მათ შორის, საქართველოს მესამე პრეზიდენტის დაცვის ყოფილ წევრ მიხეილ ბატურინს და ასევე, მიხეილ სააკაშვილის ახლო გარემოცვის წევრს, უკრაინაში მოქმედი „ქართული ლეგიონის“ მეთაურ მამუკა მამულაშვილს.
„ეს ინფორმაცია სიმართლეს არ შეესაბამება. საქართველოს დღევანდელი ხელისუფლება კიდევ ერთხელ ცდილობს უკრაინის დემონიზაციას, რათა მოაგვაროს მისი შიდა პოლიტიკური საკითხები. უკრაინის სახელმწიფო არ ჩარეულა, არ ერევა და არ გეგმავს საქართველოს საშინაო საქმეებში ჩარევას“, – აღნიშნა ოლეგ ნიკოლენკომ.