Fire mål på 25 minutt
Yang Xu scora fire gonger frå 6. til 31. minutt i Kinas siger på 7-0 over Guam i den asiatiske kvalifiseringa til VM 2022.
Den mest folkerike nasjonen i verda slit med å få skikk på fotballandslaget, og har makta å ta seg til VM berre ein gong (2002), men fekk verken mål eller poeng den gongen.
Kina har sidan satsa hardt på fotballen, og klubbane har henta stjerner for store summar. Suksessrike Marcello Lippi er landslagssjef.
Det er enno tidleg i kvalifiseringa og langt fram til VM i Qatar. Men Kina har starta godt med 12-0 på to kampar. Gruppevinnaren og dei beste toarane går vidare til det avgjerande gruppespelet, som tek til neste haust.