Sportsministeren gir Liverpool-fans hovudskulda for bråket
– Det var opptil 30-40.000 personar, hovudsakleg britiske Liverpool-tilhengarane utan billett eller med falske billettar, som var hovudårsaka til bråket før meisterligafinalen i Paris laurdag kveld, seier Frankrikes sportsminister Amelie Oudea-Castera til radiostasjonen RTL.
Kampen måtte utsetjast i 35 minutt medan politiet jobba med å halde tilbake folk som ville trenge seg inn.
Fleire med gyldig billett greidde heller ikkje å kome seg inn på arenaen.
Ho har kalla inn til eit møte for å hindre liknande problem i framtida, melder nyheitsbyrået AFP. Sommar-OL blir arrangert i Paris i 2024, og finalen i rugby-VM neste år.
– Eg er ikkje uroleg, men tvert imot heilt sikker på at vi lærte nok på laurdag til at vi skal klare å gjennomføre nye store arangement på ein god måte, sa ho.
Liverpool er på si side ekstremt skuffa over kva fansen vart utsett for.
– Dette er den største kampen i europeisk fotball, og supporterar burde ikkje måtte oppleve dei scenane vi har sett i kveld. Vi har offisielt bede om ei formell gransking av kva som skapte desse uakseptable problema, skreiv klubben i ei pressemelding.
Sportsministeren beklagar sterkt at politiet brukte tåregass også mot familiar med barn, og krev full gransking av alt som skjedde rundt kampen. Det er eit krav som også Liverpool FC har sett fram.
Liverpool FC tilbakeviser skuldingane om at det var deira fans som må bere skulda. Dei viser til at fansen stilte i kø i god tid før avspark, ikkje at dei kom veldig seint, slik UEFA hevda då dei skulle gi forklaring på utsetjinga.
– Problemet var dei mange stengde portane, som tvinga tilskodarane inn i ein flaskehals i form av ein undergang, der dei måtte gå som ein krøtterflokk. Det skapte lange køer, skate framdrift og farlege situasjonar, skriv Liverpool Echo.