Høgre ber statsministeren avklara korleis han ser på Kjerkol-saka
Utdanningspolitisk talsperson i Høgre, Jan Tore Sanner, ber statsminister Jonas Gahr Støre (Ap) forklara korleis han ser på saka om tekstlikskaper i masteroppgåva til helseminister Ingvild Kjerkol (Ap).
– Det første som slår meg er at dette er ei veldig fersk masteroppgåve som Kjerkol leverte samtidig som ho var helsepolitisk talsperson for Arbeidarpartitet på Stortinget, og kort tid før ho blei helseminister. Me burde kunna forventa endå meir av vaksne stortingspolitikarar enn av unge studentar, seier Sanner.
Han seier det er vanskeleg for han å vurdera forskjellen mellom alvorsgrada i Kjerkol og tidlegare forskings- og høgare utdanningsminister Sandra Borch si plagiat-sak.
– Det hadde vore nyttig om statsministeren kunne avklara korleis han ser på saka. Var problemet til Sandra Borch berre at ho var statsråd for forsking- og høgare utdanning?, spør Sanner.
Borch gjekk i går av som statsråd, etter å ha innrømma at ho plagierte andre studentar sine masteroppgåver då ho skreiv si masteroppgåve for ti år sidan.