Югары уку йортларында бюджет урыннары саны буенча Татарстан Россиядә беренче булды

Татарстан югары уку йортларында бюджет урыннары саны буенча Россия төбәкләре рейтингында беренче урынны яулады — республикада 23 меңнән артык бюджет урыны тәкъдим ителә. Бу хакта матбугат конференциясе вакытында РФ фән һәм югары белем министры Валерий Фальков сөйләде, дип хәбәр итәләр ведомствоның телеграм-каналында.

«Бюджет урыннарының абсолют күпчелеге — 73 процент — Татарстанда», — дип ассызыклый министр.

Татарстаннан соң икенче урынны 20 меңгә якын бюджет урынлы Свердловск өлкәсе яулый. Аннары Ростов, Новосибирск өлкәләре, Башкортстан урнаша. Шулай ук унлыкка Томск һәм Самара өлкәләре керә, биредә студентларга 13 меңнән артык бюджет урыны тәкъдим ителә. Шулай ук рейтингта Түбән Новгород өлкәсе, Краснодар крае һәм Воронеж өлкәсе дә бар.

Гомумән, 2024 елда студентларга бөтен Россиядә 621 мең бюджет урыны бирелә, шул исәптән 30 мең урын яңа төбәкләрдә була. Бу соңгы еллардагы бюджет урыннары саны буенча иң югары күрсәткеч була.

Фальков билгеләп үткәнчә, иң күп бюджет урыннары «Мәгариф» һәм «Педагогика фәннәре» юнәлешләренә бүлеп бирелгән — 75 мең. Аннан соң IT, «Клиник медицина», һәм «Урман, авыл, балык хуҗалыгы» килә. Бишлекне «Машина төзелеше» юнәлеше яба — министр бу юнәлешнең беренче тапкыр лидерлыкка чыгуын ассызыклады.

Россия югары уку йортларында кабул итү кампаниясе 20 июньгә планлаштырылган. Бакалавриат һәм белгечлек программалары буенча документлар 20 июльдән дә соңга калмыйча кабул итеп бетереләчәк. 28-30 июльдә югары уку йортларына өстенлекле кабул итү башлана (шул исәптән интеллектуаль ярышларда җиңүчеләр һәм призерлар өчен). Төп чор 3 августтан 9 августка кадәр дәвам итә.