Уласхоорондын «Байгалай харилсаан» гэһэн хуралдаан Буряад Уласта август һарада үнгэрхэнь
«Байгалай харилсаан» гэһэн уласхоорондын дүрбэдэхи хуралдаан августын эсэстэ Буряад Уласта болон Байгалай үбэрэй хизаарай дэбисхэр дээрэ зарлагдахань. Хуралдаанай гол шэглэл гээд Байгал шадар аюулгүй, ариг сэбэр байдал хамгаалга гэжэ соносхогдонхой һэн. Энээн тухай, мэдээсэлэй «Восток-Телеинформ» агентствын сурбалжалагшада Байгал далай хамгаалхые дэмжэлгын жасада дуулгаа.
Буряад орондо августын 20-һоо 25 болотор Хитад, Оросой, Японай парламентнууд хоорондын уулзалганууд хуралдаанай оршондо үнгэргэгдэхэ. Мүн ажал хэрэгэй харилсаанууд Шэтэ хотодо августын 23-24-дэ болохо байна. Хуралдаанда Буряадай, Байгал үбэрэй хизаарай, Эрхүү можын алиш хэмжээнэй һунгамалнууд хабаадалсаха. Тэдээнһээ гадна эрдэмтэд болоод ниитэ эмхинүүдэй түлөөлэгшэд уригданхай. Энэ жэл Японай, Хитадай олзын хэрэг эрхилэгшэд хабаадаха тухайгаа мэдүүлэнхэй. Хүршэ оронуудай түлөөлэгшэд Зүүн Сибириин ба Алас Дурнын байра байдал һайжаруулха арга боломжонуудые зүбшэн хэлсэхэ зорилготой.
Тус хуралдаанай талмай Россиин «Алас Дурна зүгэй болон Байгал шадарай мужын улад зоной – эдэй засагай байдал хүгжөөлгэ» гэһэн гүрэнэй шэнэ программада ороһон асуудалнуудые, мүн тэрэнээ бэелүүлхэ арга боломжонуудые зүбшэлгын газар болохо жэшээтэй. Гүрэнэй үнөөхи программа Байгал шадарай мужын хүгжэлтэдэ мүн лэ нүлөөтэй байха гээд бодомжологдоно. Тиимэһээ программын хараада абтаха зэргэтэй баримтанууд, бодол түсэбүүд тэндэ хэлсэгдэхээр хүлеэгдэнэ.
«Байгалай харилсаан» гэһэн хуралдаан нангин шүтөөн болохо Байгал далай хамгаалхын хажуугаар эндэхи үйлэдбэрилхы хүсэнүүдые һэргээн хүгжөөхэ хүсэл зорилго урдаа бариһан үндэр үүргэтэй юм. 2012 онһоо 2014 он болотор «Байгалай харилсаан» хуралдаан Буряад Уласта, Улаан-Үдэдэ үнгэргэгдэжэ байгаа гээд эндэ һануулая. Эмхидхэгшэдэйнь тэмдэглэһээр, Байгал далай хамгаалха, мүн тиихэдэ Байгал шадарай мужын хүгжэлтэ хараалһан дурадхалнуудые буйлуулан бэлдэхэ талаар зүбшэлгын уласхоорондын зиндаата талмай мүн.