Давид Трезеге «Ривер Плейт» раҳбариятида фаолият бошлади
Туриннинг «Ювентус» клуби ва Франция терма жамоасининг собиқ ҳужумчиси Давид Трезеге яна Аргентинага қайтди. У аввалроқ Буэнос-Айресдаги «Ривер Плейт» сафида ҳам тўп сурган, ҳатто клуб билан Аргентина иккинчи лигасида чемпионликни ҳам қўлга киритган эди. Бу ҳақда euro-football.ru хабар беради.
Эндиликда Трезеге «Ривер Плейт»га футболчи сифатида эмас, балки клуб бошқарувида ишлаш учун келмоқда. Унинг аниқ лавозими расман очиқланмаган бўлса-да, клуб уни тўлиқ раҳбарият иштирокида тантанали тарзда таништирди.
Тақдимот маросимида Трезегенинг стратегик йўналишлар бўйича ишлаши ва «Ривер Плейт»ни институционал даражада, яъни расмий ҳамда ташкилотлараро майдонда вакиллаши маълум қилинди.
Эслатиб ўтамиз, француз футболчи профессионал фаолиятини 2015 йилда якунлаган.