Клозе Месси ва Мбаппе унинг ЖЧ рекордини янгилаши мумкинлигини айтди
Германия терма жамоасининг собиқ ҳужумчиси Мирослав Клозе футбол бўйича Жаҳон чемпионатларидаги голлар рекорди яқин йилларда янгиланиши мумкинлигини билдирди. Бу ҳақда euro-football.ru хабар беради.
Клозе тўртта мундиалда иштирок этиб, жами 16 та гол урган. Ҳозирда амалдаги футболчилар орасида унга энг яқин кўрсаткич Лионел Мессида — 13 та, Килиан Мбаппеда эса — 12 та гол.
“Ишончим комил, ЖЧдаги голлар бўйича рекордим тез орада бузилади. Буни Месси 2026 йилда амалга ошириши мумкин, Мбаппе эса 2026 ёки 2030 йилда. Мен Леога жуда мухлиcманки, агар у фаолиятини давом эттирса, энг яхши тилакларимни тилайман. Мбаппенинг ҳам истеъдоди ақл бовар қилмайди. Умид қиламанки, иккаласи ҳам соғлом бўлади ва энг юқори даражасини кўрсатади. Ҳар қандай ҳолатда ҳам ҳозирча энг яхши статистика менда, қолаверса, мен ярим финалга тўрт марта чиққан ягона футболчиман”, — дея Клозе сўзларини келтиради Bild.
Эслатиб ўтамиз, Месси 2022 йилги Қатар мундиалида чемпион бўлган, Мбаппе 2018 йили Россияда кубокни кўтарган, Клозе эса 2014 йил Бразилияда Германия билан зафар қучган.