Кампани Гвардиоладан олган сабоғини очиқ айтди
“Бавария” бош мураббийи Венсан Кампани Хосеп Гвардиола қўл остида ишлаган пайтидан қандай хулосалар чиқарганини гапириб берди. Белгиялик мутахассис “Манчестер Сити”да испан мураббийи билан бирга фаолият юритган. Бу ҳақда euro-football.ru хабар беради.
Кампани таъкидлашича, у Гвардиоладан аввало тактикадан кўра кучли менталитетни ўрганган: доимо ғалабани кўзлаш, ҳар бир учрашувга финалдек ёндашиш ва рақиб номига қараб темпни пасайтирмаслик. Унинг фикрича, чемпионлик учун курашаётган жамоа билан қуйи лига вакилига қарши ўйин ўртасида фарқ қилмаслик ёндашуви мавсум давомида барқарорликни таъминлайди.
Эслатиб ўтамиз, Кампани “Бавария”даги ишини 2024 йил ёзида бошлаган. У “Манчестер Сити” сафида 2008–2019 йилларда тўп сурган, Гвардиола эса клубни 2016 йилдан буён бошқариб келмоқда.