Уйнарга чыгып киткән баланы ток суккан: «Мондый яра белән өлкәннәр дә исән калмый»
«Синең улыңа вышкада ток суккан!» – дип хәбәр итә Еленага авылдашы. 10 яшьлек Васяның әнисе (исемнәре үзгәртелгән) башта аңламый тора, аннары шок кичерә. Электр тапшыру линиясе баганасын ул кайдан тапкан? Нигә анда менгән?! Бу хакта «Комсомольская правда» газетасы яза.
8 июль көнне 2 малай – 10 яшьлек Вася һәм аның дусты – тимер юлга китәләр. Елена бу вакытта район үзәгендә эштә була. Балалар, кызыксынып, электр тапшыру линиясе баганасы янына килә...
Балалар баганага менә, һәм Вася ялгыш кына чыбыкка тиеп китә. Көчле разряд аның бөтен тәне аша уза, һәм ул 2 метр биеклектән егылып төшә. Күрше малае шунда ук ярдәм чакыра. 10 яшьлек малайның гомере өчен башта Тулун хастаханәсендә көрәшәләр, аннары аны Ивано-Матренин балалар клиник хастаханәсенә күчерәләр.
– Безгә кергәндә, бала аңында иде, безнең белән сөйләште, һәм медицина өлкәсендә беренче ел гына эшләмәгән реанимация хезмәткәрләрен гаҗәпкә калдырган бер нәрсә бар иде – сорауларга адекват җавап бирүче малайның башында бик зур, коточкыч яра иде. Мондый пациентны без беренче тапкыр күрдек, – дип сөйли 1 нче анестезиология-реанимация һәм интенсив терапия бүлеге мөдире Оксана Обарчук.
Вася хастаханәдә 105 (!) көн ята, аңа җитди операцияләр аша узарга туры килә. Хастаханәдән чыкканда, аңа тыныч кына утырырга, иң яхшысы – каска киеп йөрергә дип, катгый киңәш бирәләр.
– Май башында Вася әнисе белән нейрохирургия бүлегенә госпитализациягә килде. Аңа оператив дәвалау – баш сөягенә пластика кирәк иде, – дип сөйләгән хастаханәнең нейрохирургия бүлеге мөдире Андрей Ливадаров.
Ахыр чиктә, малайга пластик операция ясаганнар һәм башына титан челтәр урнаштырганнар. Аның ярдәмендә ул гадәти тормыш белән яши алачак.
– Иң мөһиме, тимер юл баганаларына бүтән менмәскә, – диләр табиблар.
Бала турында ВКонтакте челтәрнедә хастаханәнең сәхифәсендә дә язалар. Ул киләчәктә тынычы кына яши алачак, чәчләре дә була, металл рамка аша узганда тавыш та булмый, диелә хәбәрдә.