Әнвәр Нургалиев йөрәгенә тагын бер операция ясаткан

Җырчы Әнвәр Нургалиевка тагын йөрәгенә операция ясатырга туры килгән. Бу хакта ул социаль челтәрләрдә хәбәр итте.

Хастаханәдә ятып чыгуына карамастан, җырчының гастрольләр графигында үзгәрешләр булмаган.

«Дуслар, Пермь, Екатеринбург, Төмән, Себер, Чиләбе, Учалы якларында йөреп кайттык. Һәр тамашачыма аерым рәхмәтем һәм хөрмәтем. 18 шәһәр, 12 мең тамашачы, миллионлаган алкышлар һәм аңлатып бетермәслек хис-кчиерешләр.

Дөресен әйтергә кирәк, бу гастрольләр бер дә җиңелләрдән булмады. Барыйммы, юкмы, дип тә күп уйладым. Чөнки 17 сентябрь көнне Мәскәүдә йөрәгемә операция ясаттым. Тернәкләнү узарга тиеш идем. Әмма мин, иң шәп дәва – яраткан тамашачым белән бергә булу, дигән нәтиҗәгә килдем. Аллаһка шөкер, матур гына, уңышлы итеп йөреп кайттык. Ә хәзер яңа турга әзерләнәбез», – дип язды ул үзенең сәхифәсендә.

Җырчы узган ел шушы вакытларда йөрәгенә операция ясаткан иде инде.

• Әнвәр Нургалиев: «Аллаһы Тәгаләнең кисәтүе буларак кабул иттем»