Муса Җәлил биографиясе белән бәйле уникаль документ табылган
Советлар Союзы Герое, Оренбург өлкәсенең Шарлык районы Мостафа авылында туып үскән шагыйрь Муса Җәлилнең тууына 120 ел тулу алдыннан Оренбург өлкәсенең Берләшкән Дәүләт архивы танылган шагыйрьнең биографиясе белән бәйле уникаль документ тәкъдим иткән. Бу турыда Бөтендөнья татар конгрессы сайтында язалар.
2 февральдә Оренбург өлкәсе Берләштерелгән Дәүләт архивының Беляевская урамындагы архив саклагычы бинасында уникаль тарихи документ – Муса Җәлилнең (Җәлиловның) Оренбург шәһәренең Халык мәгарифе бүлегенә аның Казанга укырга җибәрелүе турында 1922 елның 5 октябрендә язылган гарәп графикасы белән татар телендә язган гаризасын тәкъдим итү булды.
Документ Оренбург өлкәсенең Берләштерелгән Дәүләт архивы хезмәткәрләре тарафыннан күргәзмә проектын юбилей датасына әзерләгәндә ачыкланган һәм Оренбург өлкәсе Архив фондының уникаль документларының төбәк реестрына кертелгән.
Россия тарихында Муса Җәлилнең әһәмиятен һәм ролен, шулай ук аның мәдәнияткә керткән өлешен исәпкә алып, документның гомумтөбәк кыйммәте Һичшиксез һәм бәхәссез булып тора. Оренбург архивистлары үтенече буенча Муса Җәлилнең гарәп алфавиты текстының транскрипциясен һәм аның рус теленә тәрҗемәсен Россия Фәннәр академиясенең Уфа федераль тикшеренү үзәгенең Тарих, тел һәм әдәбият институтының әйдәп баручы фәнни хезмәткәре, тарих фәннәре кандидаты Марсил Фәрхшатов һәм Татарстан Республикасы Дәүләт архивы белгечләре – генеалогик характердагы сорауларны үтәү бүлеге башлыгы Лилия Назыйпова һәм баш архивчы Айгөл Әхмәтова әзерләде, диелә хәбәрдә.