Күрше төбәктә өйдә качышлы уйнаганда нәни бала үлгән
Ульяновск шәһәрендә өч яшьлек бала өйдә уйнап йөргән вакытта вафат булган. Өлкә прокуратурасы тикшерү эшләре башлаган. Бу турыда ТАСС агентлыгына Ульяновск өлкәсе прокурорының өлкән ярдәмчесе Василий Зима хәбәр иткән.
«5 гыйнварга каршы төндә Отрадная урамындагы йортларның берсендә нәни бала мәете табыла. Ульяновск өлкәсенең Засвияжск районы прокуратурасы тикшерү башлады», — дигән агентлык чыганагы.
Ата-анасы сүзләренчә, алар бала белән качышлы уйный. Бала үз бүлмәсенә кереп китә. Аннары ярты сәгать чамасы бала чакыруга җавап бирми. Соңрак ачыкланганча, бала трансформер карават эченә кереп кача. Ата-анасы баланың мәетен шуннан таба.
Бала үлеменең сәбәбен ачыклау өчен экспертиза билгеләнгән. Башлангыч мәгълүматлар буенча, малай һава җитмичә, сулыш ала алмау нәтиҗәсендә һәлак булган.