Бироз олдин “Tashkent city” қурилиши режалаштирилган ҳудудда жойлашган “Ezidyor” тўйхонаси бузилиши муносабати билан унинг эгасига Тошкент шаҳар ҳокимияти томонидан “Versal” тўйхонаси берилиши ҳақида хабар тарқатган эдик. Аммо бу хабар асоссиз бўлиб чиқди. Xabar.uz мазкур масалага ойдинлик киритиш мақсадида Тошкент шаҳар ҳокимлиги билан боғланган. У ердан маълум қилишларича, ҳозир “Tashkent city” қуриладиган ҳудуд атрофидаги барча бинолар ўз эгаларининг розилиги олинган ҳолда бузиб ташланмоқда. Шунингдек, ҳокимликдан “Ezidyor” тўйхонаси эгасига “Versal” тўйхонаси берилиши ҳақидаги хабарлар ёлғон маълум қилинган. Гап шундаки, “Ezidyor” эгасига “Versal” эмас, “Саёҳат” ресторани топширилади. Шунингдек, “Ezidyor” тўйхонаси атрофидаги бузилаётган объектлар эгаларига Тошкент шаҳри, Тараққиёт кўчаси бўйидан 1-1,5 гектаргача ер берилиши ҳам маълум қилинди.
