Ўзбекистон Республикаси Фанлар академияси академиги Саидаҳрор Ғуломов Тошкент темир йўл муҳандислари институти ўқитувчи ва талабалари билан учрашди. Қайд этиш жоиз, Саидаҳрор Ғуломов мамлакатимизда бошқа зиёли олимлар сингари кўп йиллар мобайнида таълим соҳасида ўз меҳнат фаолиятини олиб борган. У республикада малакали кадрлар тайёрлаш сифатини яхшилаш, шунингдек, хориж илмий муассасалари билан ўзаро интеграцион алоқаларни ўрнатиш ишига муносиб ҳисса қўшиб келаяпти. Олимларимизнинг фундаментал билимларини ёшлар орасида тарғиб қилиш ва бой илмий фаолиятини ўрганиш, уларнинг тажрибасидан самарали фойдаланиш асосида илм олишга изланувчан иштиёқманд ёшларни бу соҳага кенгроқ жалб этиш, улар орасидан иқтидорли ва қобилияти бўлган ёшларни аниқлаш ва уларни рағбатлантириш мақсадида уюштирилган учрашувда академикнинг “Ўзбекистонда рақамли иқтисодиётнинг ривожлантиришда “ақлли таълим”нинг самарадорлиги ” мавзусидаги маърузаси тингланди. - Бўлажак иқтисодчи сифатида шуни айта оламанки, бугунги учрашувда академик томонидан биз, ёшларга берилган билим кўлами ниҳоятда кенг қамровли бўлди, - дейди талаба Нодирбек Давронов.– Мен учун шахсан олим томонидан жаҳон тажрибаларини пухта ўрганиб, ишлаб чиқилган фойдали янги методлар ва моделларнинг турфа хиллиги ёқди. Жумладан, инновацион ривожланишда инвестициялар самарадорлигини ошириш учун муҳим кўрсаткич – аҳолининг интеллектуал, касбий қобилиятини ўстириш ва таълимда инноваторликка ўргатиш, шунингдек, инвестициялар жозибадорлигини ошириш учун, “ақлли иқтисодиёт”, “ақлли таълим”, каби дастурларни амалга ошириш ҳақидаги илмий асосланган қарашлари кўпроқ менга манзур бўлди. Олим учрашув давомида ёш илм изловчиларга интеллектуал салоҳиятга таянган ҳолда инновацион ечимларни фаоллаштириш юзасидан амалий маслаҳатлар, тавсиялар берди.
