Одил Аҳмедов бўлажак Осиё кубоги ва Ўзбекистон миллий терма жамоаси ҳақида фикр билдирди
- Аввало, Осиё кубогининг Қатарда бўлиши ҳамма учун яхши деб ўйлайман. Сабаби бу давлат яқиндаги Жаҳон чемпионатини қабул қилган, шу сабаб барча инфратузилма олий даражада ва майдонлар ажойиб ҳолатда. Бундай майдонларда футболчилар маза қилиб ўйнашади.
Бўлажак қитъа чемпионатидан ижобий натижа кутяпмиз. Яхши мураббийимиз бор, яхши футболчилар жамланган. Қолаверса, барча жамоаларнинг кучи деярли денг. Олдингидек, жуда ҳам кучсиз жамоалар кам. Кўплаб терма жамоалар футбол ўйнашни ўрганиб олган. Ижобий натижа барибир аввало футболчиларнинг ўзига боғлиқ бўлади. Агар йигитлар ўзларига бўлган ишончни ва мусобақанинг масъулиятини ҳис қилса энг яхши натижага эриша оламиз.
- 2011 йил Қатардаги Осиё кубоги сизнинг суперголингиз билан бошланганди. Ўша мусобақада терма жамоамиз ўз тарихидаги энг яхши натижа қайд этишганди. Нима деб ўйлайсиз, бу йилги қитъа чемпионатида ўша тарихий натижани яхшилай оламизми?
- Ҳар бир ўйин тугаганидан кейин тарихга айланади. Менимча, футболчилар илк ўйинда керакли натижага эришишса ва керакли ўйинни намойиш эта олсак, ўзларига бўлган ишончни қайтариб олишади ҳамда халқимиз кутаётган яхши натижа билан юртимизга қайтиб келишади.
- Таркибимизга эътибор қилсак бир йўла 19 нафар футболчи Осиё кубогида олдин ўйнамаган. Мусобақада дебют қиладиган йигитларга қандай маслаҳат берасиз?
- Тўғри, футболда шундай нарса бор –дебют. Лекин куч томонлама ҳеч қандай муаммо йўқ. Ўйин бошланганидан сўнг тахминан 5-10 дақиқада ҳаяжон ва босим ўтиб кетади. Дебют қиладиган футболчиларга маслаҳатим ўзларига ишонишсин, шунда ўзлари хоҳлаган футболни намойиш эта олишади.
Абдулазиз Искандаров суҳбатлашди
