Фернандеш: Саудия таклифини рад этдим, чунки «Юнайтед» ҳали ҳам орзум
«Манчестер Юнайтед» сардори Бруну Фернандеш яқинда берган интервьюсида Саудия Арабистони клубларидан бўлган қизиқишлар ва трансфер масаласига ойдинлик киритди.
Португалиялик футболчи «Ал Ҳилол» жамоаси билан музокаралар ўтказганини тасдиқлади, аммо сўнгги қарор ўзи учун аниқ бўлганини таъкидлади.
«Ҳа, менинг “Ал Ҳилол” билан суҳбатларим бўлган, буни ҳамма билади. Шунингдек, Саудиядан ва Европанинг бошқа жамоаларидан қизиқишлар бор эди. Лекин жавобим ўзгармади — мен “Манчестер Юнайтед”да қоламан, чунки бу клуб ҳали ҳам орзумнинг бир қисми», — деди у.
Фернандешнинг сўзларига кўра, клуб раҳбарияти ва бош мураббий Рубен Аморим унинг лойиҳада муҳим ўрин тутаётганини маълум қилган:
«Мураббий мен билан гаплашди ва ҳали ҳам жамоа режасининг бир бўлаги эканимни айтди. Клуб ҳам худди шу фикрни билдирди. Агар улар менга: “Бруну, сен 30 ёшдасан, биз келажакдаги лойиҳамизда бошқа йўл танладик”, деса, мен оилам учун энг тўғри қарорни қабул қилган бўлардим. Аммо бундай бўлмади. Мен ҳали ҳам ўзимни “Юнайтед”нинг бир қисми сифатида ҳис қиламан».
Унинг таъкидлашича, Саудия томонидан таклиф қилинган шартнома моддий жиҳатдан жуда манфаатли бўлган, аммо қарор фақат пул билан боғлиқ бўлмаган.
«Таклиф ҳақиқатан ҳам жуда фойдали эди, буни инкор этмайман. Лекин мен учун ҳар доим муҳими — орзуларим ва футболдаги меросим. Мен бу ерда ўз йўлимни давом эттиришни хоҳлайман», — деди сардор.
Бруну, шунингдек, ватандоши Криштиану Роналду билан ҳам Саудия ҳақида гаплашганини билдирди, бироқ суҳбат мазмунини ошкор этмади:
«Биз бу мавзуда гаплашдик, лекин у менга нима деганини айтмаган бўлардим, лекин биз буни муҳокама қилдик. Ҳар кимнинг йўли ҳар хил».
Фернандеш ҳозирча ҳеч қандай янги музокаралар бўлмаганини, агент ҳам бу борада унга мурожаат қилмаганини маълум қилди:
«Ҳозир мен билан ҳеч ким гаплашгани йўқ. Балки кимдир ёзда қайта мурожаат қилар, лекин ҳозирча бундай ҳолат бўлмади. Агар агентим мен билан суҳбатлашмоқчи бўлса ҳам, бу фақат жаҳон чемпионатидан кейин бўлади».
Унинг сўзларига кўра, «Юнайтед»да у ҳали кўп нарсаларга эришмоқчи: ғалабалар, совринлар ва клуб шарафини янада баланд тутиш.