Астана әкімі: Қосшы мен ескі вокзал бағытында LRT жолағы салынады
Астанада орталықты Қосшы қаласымен және ескі вокзалмен жалғайтын жеңіл рельсті көлік (LRT) жолағы салынады. Бұл туралы қала әкімі Жеңіс Қасымбекке сілтеп Tengrinews.kz сайты хабарлады.
"Қосшы ұлғайып жатыр. Бұл – Астанаға түсетін жүкті азайтып, оған көмектесіп отырған үлкен спутник қала. Сол себепті Қосшыдан қалаға белсенді қозғалыс бар, келесі кезеңде осы бағытта саламыз" деп келтірді басылым әкімнің сөзін.
Жеңіс Қасымбектің сөзінше, LRT жобасының екінші кезеңінде қала орталығын ескі вокзалмен жалғайтын жолақ та салынбақ. Ол жолақ Сығанақ көшесінен басталып, Тұран көшесі арқылы ескі вокзалға жол тартады. Қосшы бағытындағы жолақтың алғашқы бөлігі бір жарым жыл ішінде аяқталады деп жоспарланып отыр. Бұл бағыттың кей жерлерінде аспалы жолақ төмен түсіп, жер бетімен өтпек.
"Бүгінде Қосшыдан қалаға күн сайын 50 мың адам келеді. Әсіресе таңғы 8:00 уақытында. Бұл Тұран, Қабанбай батыр және Мәңгілік Ел көшелерінде үлкен салмақ түсіріп отыр" деді әкім.
Астана басшысының сөзінше, жоба қаражаты қарызға алынуы мүмкін.
Қазақстанда LRT салу жоспары 2008 жылы мәлімделген. Бірақ одан кейінгі жылдары жобаны жүзеге асыру қымбатқа шығатыны ескеріліп, билік бұл идеядан бас тартқан. 2010 жылдардың ортасында жобаға қайтадан жан бітіп, Қазақстан Қытай даму банкінен 1,6 млрд доллар қарыз алды. Ол кезде ел президенті Нұрсұлтан Назарбаевтың жиені Нұрәлі Әлиев Астана әкімінің орынбасары болатын. Бірақ бұл жобаның аяғы жемқорлық дауына ұласып, Астана LRT компаниясының басшысы Талғат Ардан шетелге қашты. 2024 жылы Қазақстан соты оны сырттай 9 жылға соттады. Биыл мамырда Қазақстан ұлттық қауіпсіздік комитеті Талғат Ардан Түркияда ұсталғанын, оның Қазақстанға экстрадицияланатынын айтқан.
Осылайша LRT қадалары ел арасында "жемқорлық ескерткіші" деп аталып кетті.
Қасым-Жомарт Тоқаев 2019 жылы президент қызметіне кіріскен LRT жобасын аяқтауға басымдық берген. Биыл LRT құрылысы аяқталып, сынақтан өтіп жатыр, келесі жылдан бастап қызмет ете бастайды.