Атырау облысында тұтас бір отбасының жоғалуы: полиция күдіктіге іздеу жариялады
Атырау облысы Қызыл қоға ауданы Жангелді ауылындағы бір отбасының өліміне күдікті ретінде танылған 29 жастағы тұрғынға іздеу жарияланды. Бұл жөнінде аймақ полициясына сүйенген "Қазақпарат" хабарлады.
Полиция сонымен бірге өзге адамдардың оқиғаға қатысын тексеріп жатыр.
25 желтоқсанда Атырау облысында тұрғындардың бірі полицияға хабарласып, бауыры мен оның отбасы (барлығы 4 адам) жоғалып кеткенін айтқан. Айтуынша, олардан хабар үзілгеніне бір айдан астам уақыт болған.
6 қаңтарда ерлі-зайыптының мәйіті үйлерінің сарайынан табылып, 8 қаңтарда Жангелді ауылында жер қойнына тапсырылды.
Полиция отбасының тағы екі мүшесін іздеп жатқанын хабарлады.
Полиция бұл отбасының төрт мүшесінен бөлек – қызы мен күйеубаласының Өзбекстанға, одан әрі қарай басқа елге кеткенін анықтағанын айтқан. Іздеу жарияланған адам – сол отбасының күйеубаласы.