Прокуратура Әсет Матаевты үйқамаққа алу туралы өтінішін кері қайтарды
Прокуратура Әсет Матаевты үйқамаққа алу туралы өтінішін кері қайтарды. Бұл жөнінде ҚазТАГ ақпарат агенттігінің бас директоры Әсет Матаевтың адвокаты Елена Жигаленок хабарлады.
"Кеше прокуратура үйқамаққа алу туралы өтінішті кері қайтарды! Қазір ғана полиция департаментінен шықтық, Әсет Матаев ешқайда кетпеу туралы қолхатқа қол қойды. Әрі қарайғы жоспар – өзіміз заңсыз әрі негізсіз деп санайтын 274 және 254-баптарымен қылмыстық қудалаумен күрес" деп жазды адвокат Елена Жигаленок әлеуметтік желіде.
Желтоқсан басында ҚазТАГ ақпарат агенттігінің бас директоры Әсет Матаев пен бас редакторы Әмір Қасенов "көрінеу жалған ақпарат таратты" деген күдікке ілінген.
Желтоқсан соңында Әмір Қасеновтің үйқамаққа алынғаны белгілі болды.
Ақпарат агенттігінің үстінен Freedom Finance компаниясы арыз түсірген. Ақпарат агенттігі бұған дейін Freedom Finance компаниясындағы "алаяқтық схемалардан зардап шеккендер" жайлы деп бірнеше мақала мен видео жариялаған. ҚазТАГ басшылығы бұл қылмыстық істі сөз бостандығын шектеу әрекеті деген.
Былтыр желтоқсанда Қазақстан вице-премьері әрі мәдениет және ақпарат министрі Аида Балаева "кәсіби журналистерге қатысты әкімшілік немесе қылмыстық істердің барынша ашық әрі объективті қаралуы қажет екенін" және министрлік құзыреті аясында "журналистердің құқығын қамтамасыз етуге және сот істерінің әділ қаралуы үшін қажетті барлық шараларды қабылдайтынын" айтқан.
9 желтоқсанда Freedom Finance иесі, Ресейден шыққан, кейін Қазақстан азаматтығын алған миллиардер Тимур Турлов (Forbes журналы байлығын $5,8 млрд деп бағалаған) ҚазТАГ агенттігінің компанияның "алаяқтығы" туралы "біржақты 12 материал жариялауы" "жала жабу мен қоғам пікірін бұрмалауға бағытталған арнайы кампанияның" бір бөлігі болуы мүмкін деп мәлімдеген еді. Оның сөзінше, компания заң аясында өзінің ұстанымын қорғауға және мұның жала екендігін дәлелдеуге де дайын.