У Варшаве пратэставалі супраць інтэграцыі Беларусі з Расеяй
Удзельнікі акцыі трымалі плакаты «За незалежную Беларусь», «No Russia» ды іншыя.
У Варшаве сёння каля 20 чалавек таксама пратэставалі супраць інтэграцыі Беларусі з Расеяй. Удзельнікі, якія сабраліся ў самым цэнтры польскай сталіцы каля вежы Зыгмунта Вазы, трымалі плакаты «За незалежную Беларусь», «No Russia» ды іншыя.
Пра гэта паведаміў сузаснавальнік Беларускага Дома ў Варшаве Алесь Зарэмбюк:
– Заўжды, калі адбываюцца акцыі, асабліва, калі яны праходзяць у цэнтры, падыходзяць жыхары Варшавы. Многія з іх, на жаль, не ведаюць, што бел-чырвона-белы сцяг – гэта наш сцяг. Дзякуючы таму, што польская прэса надае шмат увагі тэме так званай паглыбленай інтэграцыі Беларусі і Расеі, многія ведаюць, што ў Варшаве жывуць беларусы, і ведаюць, супраць чаго мы пратэстуем.
Як адзначае Зарэмбюк, у акцыі прымалі ўдзел у асноўным маладыя людзі, якія прыехалі вучыцца ў Польшчу. Падобныя акцыі пратэсту прайшлі таксама ў Беластоку, Кракаве і Шчэціне.
Антон Разумоўскі, Беларускае Радыё Рацыя
Фота: Адама Завальні