Святар Андрэй Залеўскі: Ідзе вайна за нашы душы

12.03.2022 11:35

У дапамогу бежанцам з Украіны актыўна ўключылася парафія Cвятой Тройцы ўкраінскай Грэка-каталіцкай Царквы ў Беластоку. Госць Рацыі – настаяцель парафіі, святар Андрэй Залеўскі.

РР: Як вы ўспрымаеце тыя падзеі, якія зараз адбываюцца ва Украіне?

Андрэй Залеўскі: Зараз вельмі важна чуць пра тое, што адбываецца ва Украіне. Перажываем, першы тыдзень быў як нейкі параліч, духоўны, эмацыянальны, не маглі спаць. Вельмі перажываем за Украіну, за тую вайну, якую пачаў, я па-іншаму не магу яго назваць, звер. Гэта проста зверскі тое, што зараз адбываецца ва Украіне. Ён распінае Украіну, распінае на крыжы! Вельмі перажываем, і нам вельмі балюча за ўсім назіраць. Я ўжо не магу глядзець тыя навіны і прашу сваіх парафіянаў, калі яны хочуць распавядаць, то няхай расказваюць пра нейкія перамогі.

Для нашай парафіі і для ўсёй Украіны зараз вельмі патрэбная падтрымка, даваць людзям надзею, таму што, ўключаючы радыё, тэлебачанне, ты можаш даведацца, што ўсё дрэннае адбываецца. А нашы людзі зараз у тым горы, і яны патрабуюць надзеі, каб проста не з’ехаць з глузду. Людзі зараз вельмі перажываюць, і дзеці прыязджаюць у эмацыйным стрэсе. І я як святар хачу надаваць надзею, што Україна пераможа, што вайне прыйдзе канец, бо з намі Бог.

РР: Якую пасільную дапамогу аказвае ваша парафія і царква тым украінцам, якія прыехалі сюды, у Беласток, і звяртаюцца да вас па дапамогу?

Андрэй Залеўскі: Адразу, калі пачалася вайна, мае парафіяне папрасілі, каб людзі маглі дасылаць ахвяраванні на наш парафіяльны рахунак, таму што адкрываць новы не было калі. Патрэбны быў ужо зараз той рахунак. І мы зрабілі такую абвестку, калі хто хоча ахвяраваць грошы, каб дасылалі на наш парафіяльны рахунак. Мы ўжо набылі дужа спецыяльныя, нават не ведаю, як назваць, павязкі, вельмі дарагія. Збіраем і на іншую дапамогу для тэрытарыяльных сіл Украіны.Таксама мы праводзім сумесную працу з беластоцкім рыма-каталіцкім “Карытасам”. Яго кіраўнік адразу патэлефанаваў да мяне ў першы дзень, папрасіў пра сустрэчу і сказаў, што калі да вас будуць звяртацца ўкраінцы, мы ім таксама будзем дапамагаць.

У першую чаргу наша парафія дапамагае духоўна, хоць, як я ўжо сказаў, і матэрыяльна таксама. Ужо вельмі шмат людзей было ў нядзелю, якія прыехалі. Цешуся тым, што польскія родныя, я ім вельмі ўдзячны, прынялі іх у першую чаргу. Яны тэлефануюць, шукаюць святара і кажуць: ойча, мы прынялі людзей з Украіны, яны грэка-католікі, дзе вы сустракаецеся і моліцеся, а якой гадзіне? Я быў у шоку, і я вельмі ўдзячны, што на самой справе для нашых людзей патрэбна ў першую чаргу духоўная дапамога. Так, яны ў бяспецы, людзі іх прынялі ў свае дамы, і зараз яны ўсе, украінцы і беларусы таксама, патрабуюць духоўнай дапамогі. Таму што, калі па-іншаму, то гэта канец чалавеку. Мы не можам абараніць сябе, гэта вайна вядзецца не толькі зброяй, але і духоўная вайна ідзе за нашы душы. Сатана хоча знішчыць нас у духоўным плане, і ён выкарыстоўвае вайну, зброю.

Я, напрыклад, кажу парафіянам, як той чалавек-злодзей, звер пасяліўся ў нашых сэрцах? Мы ўсе зараз размаўляем пра Пуціна, навошта ён столькі месца займае ў нашых размовах? Ён не варты таго, каб займаць столькі месца ў нашых думках, размовах. Ён не годны займаць столькі месца. Трэба займацца нашым жыццём, і зараз, зразумела, вельмі патрэбны Бог. Як няма Бога, то Пуцін будзе займаць нашы сэрцы. А ён не мае права займаць нашы думкі, нашы размовы, нашы сэрцы. І для гэтага трэба маліцца, і духоўнасць павінна быць у першую чаргу. Як я кажу сваім парафіянам, вельмі шмат залежыць ад нас саміх.

Цалкам гутарку слухайце ў далучаным файле: