Наталля Радзіна: Калі Лукашэнка аддасць каманду ўступіць у вайну, то ён страціць падтрымку сілавікоў
Госця Рацыі – Наталля Радзіна, журналістка і галоўны рэдактар сайта «Хартыя-97».
РР: На вашую думку, пра што пяць гадзінаў маглі размаўляць Уладзімір Пуцін і Аляксандр Лукашэнка, канешне, акрамя таго, што перадалі нам афіцыйна іх агенцыі.
Наталля Радзіна: Сапраўды, інфармацыі вельмі мала. Але відавочна, што падчас гэтай сустрэчы абмяркоўвалася пытанне ўступлення беларускай арміі на тэрыторыю Украіны і ўвязванне беларускай арміі ў вайну, якую сёння Расея вядзе супраць Украіны з дапамогай рэжыму Лукашэнкі. Я думаю, што пяць гадзінаў Пуцін прымушаў да гэтага рашэння. І цяжка зараз сказаць, пра што яны дамовіліся. Відаць, усё ж такі Расея паабяцала рэжыму Лукашэнкі пэўную эканамічную падтрымку. І бліжэйшым час так ці інакш беларуская армія можа паспрабаваць уступіць у вайну супраць Украіны. Як гэта будзе адбывацца, пакуль цяжка сказаць. Магчыма, гэта будзе акрытае ўварванне. Аднак цяпер увесь час паступае інфармацыя пра тое, што маральны і псіхалагічны ўзровень асабовага складу беларускай арміі вельмі нізкі. Беларускія ваенныя не хочуць ваяваць супраць братэрскага народу. І афіцэры дакладаюць, што ў выпадку ўступлення беларускай арміі, магчыма масавая здача ў палон беларускіх ваенных, або пераход на бок Украіны ў гэтай вайне. А таксама пра тое, што малодшы склад можа ўзняць зброю супраць афіцэрскага складу ў выпадку калі беларускіх салдат пашлюць ваяваць ва Украіну. Магчымы таксама варыянт таго, што частка беларускіх ваенных могуць ступіць на тэрыторыю Украіны ў расейскай форме, у складзе расейскіх частак, або будуць накіраваныя пад выглядам міратворцаў нібыта для аховы Чарнобыльскай АЭС. Гэтыя варыянты цалкам магчымыя на мой погляд.
РР: У мяне такое ўражанне, што апошнім часам Лукашэнка значна астыў у сваіх ваяўнічых памкненнях. Мо сапраўды ён не цалкам кантралюе сваю армію?
Наталля Радзіна: Я думаю, што гэтыя першыя бравурныя заявы, якія Лукашэнка сказаў у адрас Украіны, хамскія выказванні ў адрас Зяленскага і ў адрас беларускіх ваенных, яны звязаны з тым, што ён чакаў бліц-крыг і што Украіна здасца на працягу 3-4 дзён. Зараз, калі ён бачыць, якія страты нясе расейская армія, а мы ведаем, што ўжо блізу 12 тысяч загінулых расейскіх ваенных ва Украіне, а таксама вялікія страты тэхнікі. І ў гэтай сітуацыі Лукашэнка, канешне, разумее, што ў выпадку ўступлення беларускай арміі на тэрыторыю Украіны будуць такія ж вялікія страты і сярод беларускіх ваенных. А гэта прывядзе да таго, што сілавікі адвярнуцца ад самога Лукашэнкі і ён пазбавіцца сваёй адзінай і апошняй апоры.
Цалкам размова:
Размаўляў Міхал Андрасюк, Беларускае Радыё Рацыя