Агляд прэсы: Надламаны «мост»
Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
Artykuł Агляд прэсы: Надламаны «мост» pochodzi z serwisu БЕЛАРУСКАЕ РАДЫЁ РАЦЫЯ.
Памерла каралева Лізавета II. Выведка Вялікабрытаніі не бачыць прыкметаў падрыхтоўкі да прамога ўцягвання Беларусі ў вайну ва Украіне. Новы віток напружанасці паміж Турцыяй і Грэцыяй. ЕЦБ рэзка падняў ключавую стаўку. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
У чацвер ва ўзросце 96 гадоў памерла каралева Вялікабрытаніі і кіраўнік Садружнасці нацый Лізавета II. Яна сышла ў асяроддзі чальцоў сваёй сям’і ў замку Балмарал, прыватнай рэзідэнцыі ангельскіх каралёў у Шатландыі. З усіх манархаў у гісторыі Вялікабрытаніі Лізавета II кіравала даўжэй за ўсіх, а ўсяго тры месяцы таму яна адсвяткавала свой плацінавы юбілей на троне. Еўрапейская прэса паважліва піша пра тое, якой была Лізавета, але пры гэтым акідвае крытычным поглядам перыяд яе кіравання і яе пераемніка, новага караля Карла III.
«Каралеве варта было б нашмат больш казаць аб негатыўных наступствах каланіялізму», – піша італьянская газета Avvenire.
«Лізавета бачыла ўсё, і амаль усяму пазбягала выносіць ацэнку. Яна прытрымлівалася пратакола, якому сама падпарадкавалася з моманту каранацыі: захоўваць маўчанне. Шмат пра што, занадта многа яна маўчала або, быць можа, паведамляла шэптам, выключна сваім прэм’ер-міністрам. Занадта часта заплюшчвала яна вочы на былыя злачынствы імперыі, якой было так цяжка адмовіцца ад каланіялізму, які афарбаваў у адзіны колер шматлікія калоніі брытанскай кароны на карце: Індыю, Суэц, Блізкі Усход, дзе межы Сірыі, Лівана, Іарданіі, Ірака, Палестыны, нібы па лінарцы», – адзначае італьянскае выданне.
***
«Вайскоўцы Беларусі, паўночнага суседа Украіны, пачалі звычайныя вучэнні па вяртанні тэрыторыі, захопленай «варожымі сіламі», і забеспячэнні бяспекі сваіх межаў. Вучэнні працягнуцца да 14 верасня 2022 года. Вучэнні праходзяць недалёка ад Берасця каля польскай мяжы, вакол беларускай сталіцы Менску і ў паўночна-ўсходняй частцы Віцебска», – перадае звесткі ад выведкі брытанскае выданне Defenceblog.
„Паводле дадзеных выведкі Вялікабрытаніі, «узброеныя сілы Беларусі маюць абмежаваныя наступальныя магчымасці і верагоднасць таго, што яны ўвялі сілы ва Украіну, малая». Вельмі малаверагодна, што гэтыя вучэнні з’яўляюцца сведчаннем падрыхтоўкі да непасрэднага ўдзелу Беларусі ў вайне ва Украіне.
Ваенныя аналітыкі таксама скептычна ставіліся да таго, што Беларусь захоча далучыць свае сілы да расейскага ўварвання ва Украіну. Найбольш верагодны сцэнар — захаванне статус-кво», – паведамляе брытанскае выданне.
***
Тлеючая спрэчка паміж Турцыяй і Грэцыяй пагражае абвастрыцца пасля новага інцыдэнту. Анкара абвінавачвае Афіны ў палётах у паветранай прасторы над Эгейскім морам, што нібыта пагражае бяспецы Турцыі. Грэчаскі бок абвінавачанні адмаўляе. «Еўразвяз абавязаны растлумачыць Грэцыі рэальную расстаноўку сіл», – заклікае турэцкая газета Milliyet.
«ЕЗ павінен сачыць за сітуацыяй, дзейнічаць абачліва і прытармазіць Грэцыю. Акрамя таго, краіны ЕЗ, здаецца, чакае вельмі складаная зіма з-за праблем з Расеяй. Але ніхто не бярэ ўрокаў з былых канфліктаў і напружанасці, якая ўзнікае. Найважнейшым выпрабавальным каменем для ЕЗ стане Грэцыя. Хаця супольнасць шукае альтэрнатывы, транспартаваць газ у Еўропу без Турцыі вельмі складана. ЕЗ абавязаны сумесна з Турцыяй ажыццявіць праект, які быў бы выгадны ўсім бакам. Еўразвязу трэба паказаць распешчанай Грэцыі рэальную карціну. Толькі так можна забяспечыць мір, росквіт і бяспеку ў рэгіёне», – патрабуе турэцкае выданне.
***
Еўрапейскі цэнтральны банк падняў працэнтную стаўку на 0,75 працэнтных пункты. Гэтае беспрэцэдэнтнае павышэнне за ўвесь перыяд з моманту ўвядзення еўра. Цяпер ключавая стаўка складае 1,25 працэнты. Рашэнне аб адмове ад шматгадовай палітыкі нулявой працэнтнай стаўкі было прынята рэгулятарам яшчэ ўлетку. Мэта гэтай меры – утаймаванне інфляцыі, якая дасягнула ў еўразоне адзнакі ў 9,1 працэнта. На думку СМІ, ЕЦБ занадта доўга знаходзіўся ў спячцы. На думку гішпанскай газеты El Mundo, ЕЦБ выявіў недаравальную блізарукасць.
«Рэгулятар капітуляваў пры з’яўленні прыкметаў таго, што інфляцыя выходзіць з-пад кантролю, а да гэтага ён на працягу цэлага дзесяцігоддзя забяспечваў даступныя крэдыты і танныя грошы. Неабходнасць астудзіць эканоміку стала надзённай, нават цаной таго, што ў Еўропе можа ўзнікнуць рэцэсія. Гэта самае значнае павышэнне працэнтнай стаўкі ў гісторыі: 0,75 працэнтных пункты. ЕЦБ можна папракнуць у тым, што ў “тлустыя” гады ў яго было дастаткова магчымасцяў паступова павышаць працэнтныя стаўкі, але ён гэтага не рабіў, а цяпер аказаўся вымушаным пайсці на такі беспрэцэдэнтны крок, паколькі хатнія гаспадаркі і кампаніі аказаліся вельмі ўразлівымі: цяпер іх чакаюць больш дарагія іпатэкі і крэдыты”, – папярэджвае гішпанскае выданне.
Агляд сусветнай прэсы падрыхтавала Вольга Сямашка
Artykuł Агляд прэсы: Надламаны «мост» pochodzi z serwisu БЕЛАРУСКАЕ РАДЫЁ РАЦЫЯ.