На Віцебшчыне не засталося райцэнтраў, у якіх няма сталага каталіцкага храма
На Віцебшчыне асвяцілі касцёл у Сянне. Наведаўшы ўрачыстую падзею, пісьменнік з Віцебска Франц Сіўко выклаў у фэйсбуку невялікі рэпартаж пра цікавосткі гэтай мясцовасці, упрыгожаны фотаздымкамі Васіля Мядзюхі.
Кансэкрацыя касцёла Святой Тройцы ў Сянне — апошнім раённым цэнтры Віцебшчыны, дзе дагэтуль не было сталага каталіцкага храма. Даўнейшы, пабудаваны францішканцамі ў XVII стагоддзі, быў зруйнаваны тут у 1962 годзе. А новаўтвораная на пачатку гэтага стагоддзя парафіяльная супольнасць тулілася ў часовай капліцы наўзбоч збудаванага ў 1809 годзе францішканскага кляштара, які па сённяшні дзень з’яўляецца самым старым каменным будынкам мястэчка.
Інтэр’ер новага касцёла — цалкам плод думкі і рук ураджэнца Сянна айца Міхала Ермашкевіча, дамініканіна, пробашча парафіі.
А самым вядомым з яго папярэднікаў быў ксёндз Аляксандр Астрамовіч, вядомы аматарам літаратуры пад псеўданімам Андрэй Зязюля. Ён пахаваны на мясцовых могілках, а помны знак на яго сімвалічнай магіле і крыж пры ёй былі ўсталяваныя ў 2003 годзе з ініцыятывы тадышняга пробашча парафіі паляка Януша Прусіноўскага. Які за два гады працы ў Беларусі вывучыў нашу мову так, што здагадацца пра яго паходжанне было немагчыма.
Artykuł На Віцебшчыне не засталося райцэнтраў, у якіх няма сталага каталіцкага храма pochodzi z serwisu БЕЛАРУСКАЕ РАДЫЁ РАЦЫЯ.