Новы тэлесезон на «Беларусь 3»

18 верасня пачынаецца новы вяшчальны сезон. Гэта значыць, што, акрамя свежых выпускаў ужо вядомых перадач, у эфіры з'явяцца прэм’ерныя праекты.

Хутка мы прадставім пазнавальныя праграмы, прысвечаныя мінуламу Беларусі. Цыкл «Памяць зямлі маёй», прымеркаваны да Года гістарычнай памяці, раскажа пра дзесяць знакавых айчынных мемарыяльных комплексаў, іх значнасць і кантэкст стварэння.

Пра людзей, якія змянілі ход не толькі беларускай, але і сусветнай гісторыі, якія зрабілі значны ўнёсак у развіццё культуры і навукі, раскажа прэм'ерны цыкл «Асобы». Дакументальны праект нагадае гледачам пра суайчыннікаў, чыімі дасягненнямі па праве ганарыцца краіна.

Яшчэ адна восеньская прэм'ера «Беларусь 3» – праект «Народны строй», што абяцае стаць відэаэнцыклапедыяй нацыянальнага касцюма беларусаў. Кожны выпуск будзе прысвечаны аднаму этнаграфічнаму рэгіёну нашай краіны. Аўтары праграмы наведаюць музеі, дамы культуры і рамёстваў, сустрэнуцца з майстрамі, якія ствараюць унікальныя народныя строі. Акрамя таго, гісторыкі, этнографы і фалькларысты раскажуць пра асаблівасці кожнага рэгіёна, што адлюстраваліся ў элементах касцюмаў.

Рыхтуецца да выхаду поўнаметражны дакументальны фільм «Дарога памяці», вынік сумеснага праекта нашага тэлеканала і Беларускага дзяржаўнага музея гісторыі Вялікай Айчыннай вайны. У аснове стужкі – падарожжа перасоўнай музейнай экспазіцыі па гарадах краіны. Падчас праекта іх жыхары перадалі ў фонды музея сямейныя рэліквіі і іншыя артэфакты мінуўшчыны.

Таксама у свежым сезоне мы плануем паказаць мноства пастановак, музычных і танцавальных канцэртаў. Напрыклад, хутка ў эфіры канала «Беларусь 3» – новы спектакль Рэспубліканскага тэатра беларускай драматургіі «Альпійская балада». У канцы верасня вас чакае тэлепрэм'ера Вялікага тэатра – опера Каміля Сен-Санса «Самсон і Даліла». Акрамя таго, сумесна з Сімфанічным аркестрам Белтэлерадыёкампаніі мы працягваем здымкі ўласнага праекта «Вечары з сімфанічным аркестрам». Кожнае выступленне распавядае пра пэўны перыяд нацыянальнай музычнай гісторыі і знаёміць з малавядомымі творамі айчынных кампазітараў.

Таксама ў найбліжэйшыя месяцы выхадам тэматычных цыклаў перадач мы адзначым важныя для беларускай культуры юбілеі: 90-годдзе Нацыянальнага акадэмічнага Вялікага тэатра оперы і балета і 140-годдзе з дня нараджэння Якуба Коласа. Адна прэм'ера будзе прымеркавана і да Дня беларускага кіно: у снежні наш канал прадставіць новую дакументальную стужку Сяргея Кацьера «Скульптурны партрэт на фоне часу і кіно», прысвечаную кінааператару, фотамастаку, пісьменніку і грамадскаму дзеячу Анатолю Забалоцкаму.