Gulagu.net апублікаваў паказаньні былых камандзіраў ПВК «Вагнэра» пра забойства дзяцей у Салядары і Бахмуце
«Прызнаньня мала. Павінна быць пакараньне», — заявіў, камэнтуючы публікацыю, кіраўнік офісу прэзыдэнта Ўкраіны Уладзіміра Зяленскага Андрэй Ярмак, піша «Медуза».
Праект Gulagu.net Уладзіміра Асечкіна апублікаваў паказаньні двух былых зьняволеных, Азамата Ўлдарава і Аляксея Савічава, якія ваявалі ва Ўкраіне ў складзе ПВК «Вагнэра». І Ўлдараў, і Савічаў былі памілаваныя ўказам прэзыдэнта Расеі. У ПВК «Вагнэра» яны займалі камандныя пасты. Пацьверджаньня іх паказаньняў зь іншых крыніц няма.
Савічаў, які, паводле яго слоў, правёў у месцах пазбаўленьня волі 30 гадоў, расказаў, у прыватнасьці, што пры ім былі расстраляныя каля 70 былых зьняволеных, якія адмаўляліся выконваць загады.
Акрамя таго, Савічаў прызнаўся, што ў студзені 2023 году на тэрыторыі Бахмуту на загад вышэйстаячых камандзіраў кінуў 30 гранат Ф-1 у яму, запоўненую забітымі і параненымі ўкраінцамі і расейцамі, а затым заліў парэшткі прыкладна 60 чалавек бэнзінам і падпаліў, каб зьнішчыць целы. Савічаў таксама падрабязна расказаў на камэру пра забойства 10 падлеткаў і больш як 20 бяззбройных украінцаў на распараджэньне камандзіраў, а таксама пра загад «зачысьціць жылы дом» і забіць усіх, хто знаходзіўся ў ім.
Улдараў, у сваю чаргу, заявіў, што на загад забіваў дзяцей у Салядары і Бахмуце. Паводле слоў Улдарава, «давалі каманду зачысьціць і зьнішчыць усіх» — мужчын, жанчын, старых і дзяцей. Ён расказаў, як забіў дзяўчынку ў Салядары. «Ёй пяць-шэсьць гадоў, а я стрэліў, ты разумееш, кантрольны», — расказаў ён.
І Ўлдараў, і Савічаў сьцьвярджаюць, што камандаваньне ПВК «Вагнэра» пагражае наймітам «абнуленьнем», гэта значыць забойствам, за зносіны з журналістамі і раскрыцьцё якой-небудзь інфармацыі пра тое, што адбывалася ў зоне баявых дзеяньняў. Найміты, адказваючы на наводныя пытаньні Асечкіна, заявілі, што ўпэўненыя ў тым, што заснавальнік ПВК Яўген Прыгожын выконвае распараджэньні Ўладзіміра Пуціна, а расьсьледаваць злачынствы, учыненыя ў зоне баявых дзеяньняў, у Расеі ня будуць.
Публікацыю відэа пракамэнтаваў кіраўнік офісу прэзыдэнта Ўкраіны Андрэй Ярмак. «Нацыя нелюдзяў і забойцаў, біялягічнае сьмецьце гэтага сьвету», — напісаў Ярмак у тэлеграме. «Аднаго прызнаньня мала. Павінна быць пакараньне. Цьвёрдае і справядлівае. І яно абавязкова будзе», — дадаў ён.
Прыгожын адмаўляе інфармацыю з публікацыі Gulagu.net. «Наконт расстрэлаў дзяцей: вядома ж, ніхто ніколі не расстрэльвае ні мірняк (мірных жыхароў. — РС), ні дзяцей. Гэта нікому абсалютна не патрэбна. Мы туды прыйшлі, каб выратаваць іх ад таго рэжыму, пад якім яны знаходзіліся», — заявіў ён.