Футбалісты „Смаргоні” перамаглі на старце 5-га тура чэмпіянату Беларусі
Сёння, 22 красавіка, адбудуцца яшчэ тры матчы чэмпіяната Беларусі.
Artykuł Футбалісты „Смаргоні” перамаглі на старце 5-га тура чэмпіянату Беларусі pochodzi z serwisu БЕЛАРУСКАЕ РАДЫЁ РАЦЫЯ.
Футбалісты „Смаргоні” перамаглі „Слуцк” у стартавым паядынку 5-га тура чэмпіянату Беларусі. У першым тайме сустрэчы ў Смаргоні супернікі абмяняліся галамі, пасля перапынку госці выйшлі наперад – 2:1, а потым гаспадары забілі два мячы і выйгралі з лікам 3:2. Сёння, 22 красавіка, адбудуцца яшчэ тры матчы. Лідар чэмпіянату менскае „Дынама”, якое мае 12 ачкоў з 12 магчымых, прыме наваполацкі „Нафтан”. У Жодзіне футбалісты „Тарпеда-БелАЗа” згуляюць з „Іслаччу” з Мінскага раёна. У Бабруйску мясцовая „Белшына” сустрэнецца са „Славіяй”.
Баскетбалісткі „Гарызонта” выйшлі наперад у фінале чэмпіянату Беларусі
Баскетбалісткі „Гарызонта” выйшлі наперад у фінальнай серыі чэмпіянату Беларусі, якая працягнецца да трох вікторый. Дзейныя чэмпіёнкі краіны абыгралі гарадзенскую „Алімпію” 63:52. Другі матч серыі за чэмпіёнскі тытул да трох перамог адбудзецца 23 красавіка. Летась гэтыя супернікі таксама сустракаліся ў залатой серыі, і тады „Гарызонт” перайграў „Алімпію” з сухім лікам 3:0.
На наступным тыдні на мужчынскім чэмпіянаце краіны пачнуцца паўфінальныя серыі. Дзеючы чэмпіён Беларусі БК „Мінск” згуляе з віцебскім „Рубонам”, а срэбраны прызёр магілёўскі „Барысфен” сустрэнецца з баскетбалістамі „Гродна-93”.
Беларуска Арына Сабаленка выйшла ў паўфінал турніру WTA-500 у Штутгарце
Беларуская тэнісістка Арына Сабаленка прабілася ў паўфінал турніру катэгорыі WTA-500 у нямецкім Штутгарце з прызавым фондам 780 тысяч даляраў. У чвэрцьфінале другая ракетка планеты адолела ў трохсэтавым паядынку іспанку Паўлу Бадосу, у якой 31-я пазіцыя ў сусветным рэйтынгу, – 4:6, 6:4, 6:4. У вырашальнай партыі беларуска вяла 3:0, потым Бадоса дагнала яе – 3:3, затым Арына зноў узяла тры ачкі запар. У актыве Сабаленкі 4 падачы на вылет, у пасіве – 5 падвойных памылак. Сустрэча працягвалася 2 гадзіны 30 хвілін.
Граматнёва перамагла на маладзёжным першынстве Еўропы па самба
У ізраільскай Хайфе стартавала маладзёжнае першынство кантынента па самба з удзелам беларусаў. У пятніцу медалі кантынентальнага форуму разыгрывалі спартоўцы не старэйшыя за 20 гадоў. Нашу краіну прадставілі 14 самбістаў, 11 з іх заваявалі медалі – 1 залаты, 5 срэбраных і 5 бронзавых. Перамогу ў вагавай катэгорыі да 80 кг у юніёрак святкавала беларуска Паліна Граматнёва, якая ў фінальным паядынку адолела расейку Паліну Юдзіну.
Міжнародная федэрацыя стральбы з лука дапусціла беларусаў да спаборніцтваў
Міжнародная федэрацыя стральбы з лука дапусціла беларускіх і расейскіх спартоўцаў да індывідуальных міжнародных спаборніцтваў. Такое рашэнне прыняла яе выканаўчая рада. У заяве адзначаецца, што „дазваляецца вяртанне толькі тых атлетаў, якія змогуць даказаць свой нейтралітэт праз працэс незалежнай праверкі”.
Пры гэтым працягваюць дзейнічаць санкцыі, якія забараняюць правядзенне мерапрыемстваў у Беларусі і Расеі, а таксама выкарыстанне нацыянальных сцягоў і гімнаў Беларусі і Расеі на ўсіх спаборніцтвах.
Беларускае Радыё Рацыя
Artykuł Футбалісты „Смаргоні” перамаглі на старце 5-га тура чэмпіянату Беларусі pochodzi z serwisu БЕЛАРУСКАЕ РАДЫЁ РАЦЫЯ.