Жыў у Паставах паэт і настаўнік
25 красавіка настаўніку беларускай мовы і літаратуры Пастаўскай сярэдняй школы № 1, паэту Леаніду Трубачу споўнілася б 60 гадоў.
Artykuł Жыў у Паставах паэт і настаўнік pochodzi z serwisu БЕЛАРУСКАЕ РАДЫЁ РАЦЫЯ.
25 красавіка настаўніку беларускай мовы і літаратуры Пастаўскай сярэдняй школы № 1, паэту Леаніду Трубачу (1963-2009) споўнілася б толькі 60 гадоў з дня нараджэння.
Цяжка паверыць, што няма ўжо ў Паставах Леаніда Трубача. Няма выдатнага філолага, педагога, калегі, бацькі і, вядома ж, цудоўнага паэта. Невылечная хвароба 46-гадовага мужчыну скасіла вельмі хутка – у 2009 годзе.
Калі Леанід Трубач вучыўся на філфаку БДУ, ён захапляўся паэзіяй свайго земляка Уладзіміра Дубоўкі. Пра Дубоўку ён мог распавядаць суткамі. Ужо тады ў 1980-я гады ён расказваў пра тое, што паэт 27 гадоў прасядзеў у сталінскіх лагерах, а пасля рэабілітацыі яму не дазволілі жыць у Беларусі і ён стала асеў у Маскве. Ды і дыпломная праца ў Леаніда Трубача была прысвечаная творчасці Уладзіміра Дубоўкі. А кіраўніком гэтай працы быў народны паэт Беларусі Ніл Гілевіч.
Нарадзіўся Леанід Трубач 25 красавіка 1963 года ў вёсцы Гута Пастаўскага раёна. Скончыў Пастаўскую сярэднюю школу № 1 і філалагічны факультэт Белдзяржуніверсітэта. Наведваў літаратурнае аб’яднанне “Узлёт”, якім кіраваў Алег Лойка. Пасля заканчэння ўніверсітэта малады, узнёслы, поўны мар і творчых ідэй, вярнуўся ён на родную Пастаўшчыну. Спачатку працаваў настаўнікам рускай мовы і літаратуры ў Цёплаўскай васьмігадовай школе, а потым — выкладчыкам роднай мовы і літаратуры ў СШ № 1 г. Паставы. У той самай школе, дзе вучыўся сам.
Леаніду Трубачу рэдка выпадалі дарункі лёсу. Рана не стала ў яго бацькі. Потым памёр айчым, а затым гэты свет пакінула і маці. За маці ён вельмі перажываў, думаў, трывожыўся. А яшчэ яго хваляў лёс роднай мовы, лёс краіны. За ўсё Лёня хварэў душой і сэрцам.
Вершы Леанід Трубач пісаў рэдка, больш пераапрацоўваў ранейшыя, перапісваў радкі, строфы. Друкаваўся ў розных рэспубліканскіх выданнях, а таксама ў калектыўных зборніках. Раілі яму сабраць усе творы пад адну вокладку і выдаць асобным зборнічкам. Ён катэгарычна адмаўляўся і казаў, што сёння не да вершаў, ды і час на іх не прыйшоў. У апошнія гады Леанід пісаў сцэнарыі школьных мерапрыемстваў. Яму гэта падабалася, ён бачыў на школьнай сцэне, як сцэнарыст і рэжысёр, вынікі сваёй працы…
У 2010 годзе аднакурснікі сабралі лепшыя творы Леаніда Трубача і выдалі асобнай кнігай “Паміж песняй і болем”. Кніга выйшла з друку пры фінансавай падтрымцы яго аднакурснікаў-філолагаў.
Беларускае Радыё Рацыя
Artykuł Жыў у Паставах паэт і настаўнік pochodzi z serwisu БЕЛАРУСКАЕ РАДЫЁ РАЦЫЯ.