Агляд прэсы: У пошуках выйсця
Беларусь ізноў правядзе вучэнні. Дылема забароны на імпарт украінскага збожжа. Азербайджан заявіў пра кантроль над Нагорным Карабахам.
Artykuł Агляд прэсы: У пошуках выйсця pochodzi z serwisu БЕЛАРУСКАЕ РАДЫЁ РАЦЫЯ.
Беларусь ізноў правядзе вучэнні. Дылема забароны на імпарт украінскага збожжа. Азербайджан заявіў пра кантроль над Нагорным Карабахам. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Украіна ўзмацняе ахову сваіх паўночных межаў і павышае гатоўнасць сіл да рэагавання пасля таго, як Беларусь аб’явіла аб правядзенні вучэнняў», – паведамляе арабская газета Аl Аrabiya.
«Мэта вучэнняў — быццам, павышэнне ўзроўню гатоўнасці органаў ваеннага кіравання аператыўных фарміраванняў да забеспячэння бесперапыннага кіравання падпарадкаванымі сіламі і сродкамі падчас вядзення баявых дзеянняў. Вучэнні пройдуць у некалькі этапаў з 22 па 26 верасня на розных палігонах і мясцовасці, пераважна ў Берасцейскай, Гарадзенскай і Менскай абласцях.
Камандуючы Аб’яднанымі сіламі Узброеных сіл Украіны Сяргей Наеў заявіў, што рыхтуемыя беларускія вайсковыя вучэнні не ствараюць ваеннай пагрозы, але пэўная небяспека ёсць. Украіна ўсё ж павышае пільнасць і рыхтуе сілы да адэкватнага рэагавання. Гэта звычайная ваенная практыка і арыфметыка – украінскіх сіл павінна быць дастаткова для нейтралізацыі ваеннай пагрозы.
У выніку маем, што Беларусь выкарыстоўвалася ў якасці плацдарма для расейскіх войскаў, ракет і авіяцыі як да, так і пасля таго, як Расея пачала ўварванне ва Украіну 24 лютага 2022 года. Аднак Беларусь устрымалася ад разгортвання ўласных сіл у прамых баях», – нагадвае арабскае выданне.
Спрэчка вакол забароны на ўвоз украінскай сельскагаспадарчай прадукцыі, уведзеная некаторымі краінамі ЕЗ, абвастраецца. Выступаючы ў ААН, прэзідэнт Украіны Уладзімір Зяленскі раскрытыкаваў Польшчу, заявіўшы пра яе недастатковую салідарнасць. У адказ Варшава выклікала ўкраінскага амбасадара, а прэм’ер-міністр Маравецкі ў адным з інтэрв’ю нават паставіў пад пытанне далейшыя пастаўкі шэрагу ўзбраенняў. Пражская газета Deník акрэслівае магчымы выхад з гэтай дылемы.
«Калі Украіна не зможа атрымліваць грошы за кошт продажу свайго збожжа, то тады мы павінны дапамагчы ёй фінансава іншым спосабам. Таму, верагодна, будзе лепш, калі мы будзем закупляць украінскае зерне. Мы проста павінны разумна падысці да гэтага пытання. Магчыма, мы маглі б на ўзроўні Еўразвяза танна прадаваць гэтае зерне краінам трэцяга свету, у якіх цяпер не хапае харчавання і, па ўсёй верагоднасці, не будзе хапаць і надалей», – прапануе чэшскае выданне.
Пасля жорсткай атакі азербайджанскіх войскаў на Нагорны Карабах прэзідэнт Азербайджана Ільхам Аліеў заявіў пра перамогу Баку над «сепаратысцкім» рэгіёнам. Афіцыйныя прадстаўнікі самаабвешчанай Нагорна-Карабахскай рэспублікі пагадзіліся на рэжым спынення агню, які мае на ўвазе тое, што армянскія байцы складуць зброю. Тысячы армян пачалі пакідаць спрэчны рэгіён. Аглядальнікі разважаюць пра тое, што прывяло да такога развіцця сітуацыі. «Хуткая перамога Баку над Нагорным Карабахам стала магчымай толькі з адмашкі Пуціна», – лічыць заграбская газета Večernji list.
«Магчыма, Пашынян усвядоміў, што не атрымае ад ЗША дапамогі, абяцанай яму да і пасля ваенных вучэнняў Eagle Partner 2023. Гэтыя вучэнні, на думку многіх экспертаў, сталі прычынай таго, што Уладзімір Пуцін даў Азербайджану «зялёнае святло» на захоп тэрыторыі Нагорнага Карабаха, і, такім чынам, пакараў непаслухмянага прэм’ер-міністра Арменіі Пашыняна, які адвярнуўся ад Пуціна і пайшоў на занадта моцнае збліжэнне з ЗША. Армяне выдатна гэта разумеюць; пра гэта сведчыць хаця б той факт, што людзі зладзілі дэманстрацыю перад пасольствам Расеі ў Ерэване і не паскупіліся на крытыку ў адрас Масквы», – канстатуе харвацкае выданне.
Прэм’ер-міністр Рышы Сунак аб’явіў пра паслабленні у справе дасягнення кліматычных мэт, якія раней паставіла перад сабой Вялікабрытанія. Запланаваная забарона на продаж новых аўтамабіляў на дызелі або бензіне будзе адкладзена на пяць гадоў, да 2035 года. Рэалізацыя плана па адмове ад газавага ацяплення таксама будзе праходзіць больш павольна, без залішняй спешкі. Гэтыя рашэнні Сунак абгрунтаваў непрымальна высокімі выдаткамі, якія ў адваротным выпадку панеслі б грамадзяне. «Гэта няправільны крок», – мяркуе брытанскі часопіс Financial Times.
«Вялікабрытанія ў свой час заняла лідзіруючую пазіцыю, стаўшы першай буйной эканамічна развітай дзяржавай, якая замацавала ў сваім заканадаўстве мэту выйсці да 2050 года на нулявую эмісію. Адмова ад гэтай ролі дасць іншым буйным эканамічным дзяржавам нагоду прытармазіць свае намаганні. Гэты крок Вялікабрытаніі таксама ўскладніць задачу пераканаць эканомікі, якія развіваюцца, ў неабходнасці прымаць меры кліматычнага характару. Зрабіць крок назад – дрэнна для самой Вялікабрытаніі, для яе эканомікі і канкурэнтаздольнасці. Гэта толькі пагоршыць агульную няўпэўненасць і нявызначанасць, роўна як і недахоп даверу ўраду, які такім чынам адмаўляецца ад выканання ўзятых на сябе абавязацельстваў. Недавер да ўрада прывёў да таго, што ўзровень інвестыцый у бізнэсе стагнуе, прычым ужо з 2016 года!», – адзначае брытанскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
Artykuł Агляд прэсы: У пошуках выйсця pochodzi z serwisu БЕЛАРУСКАЕ РАДЫЁ РАЦЫЯ.