ՀԱՊԿ զորավարժությանը կմասնակցի 12 հազար զինծառայող, 1500-ից ավել զրահատեխնիկա, 50-ից ավել թռչող սարք. Վաղարշակ Հարությունյան
Տասներկու հազար զինծառայողից բաղկացած անձնակազմ, 1500-ից ավել զրահատեխնիկա և տեխնիկա, 50-ից ավել թռչող սարքեր. ՀԱՊԿ-ի ծրագրի համաձայն՝ հոկտեմբերի 6-ից կանցկացվեն լայնամասշտաբ զորավարժություններ: Ինչպես «Արմենպրես»-ի մամուլի սրահում հրավիրված ասուլիսի ժամանակ նշել է ՀՀ պաշտպանության նախկին նախարար Վաղարշակ Հարությունյանը, զորավարժությունները կանցկացվեն 4 պետության տարածքում՝ Ռուսաստան, Հայաստան, Ղազախստան, Տաջիկստան: Մասնակցելու են ՀԱՊԿ անդամ բոլոր պետությունները: Նպատակն է բարելավել ՀԱՊԿ կազմակերպության ղեկավարման համակարգը:
«Ինչպես գիտեք ՀԱՊԿ կանոնադրությունն է ասում` կանխել ագրեսիան անդամ պետությունների հանդեպ: Ահա այս համատեղ զորավարժությունը, որի անվանումն է «Մարտական եղբայրություն 2017» անցկացվելու է մի քանի փուլերով: Հայաստանում մի փուլն է անցկացվելու, մասնակցելու են հետախուզական ստորաբաժանումներ, վերջերս ձևավորված խմբավորումը, օպերատիվ արձագանքման կոլեկտիվ ուժերը և այլն: Վերջին փուլը անցկացվելու է Տաջիկստանում»,-ասել է Վաղարշակ Հարությունյանը:
Զորավարժություններին ներկա է լինելու ՀԱՊԿ-ի ղեկավարությունը, քարտուղարությունը, Կարմիր խաչը:
Լրագրողների այն հարցին, թե այս զորավարժություններով պայմանավորված արդյոք Ադրբեջանի մոտ կա անհանգստություն, Վաղարշակ Հարությունյանը պատասխանել է, որ կա և դա բնական է:
Վաղարշակ Հարությունյանի խոսքով` այս զորավարժությունները վկայում են այն մասին, որ ռազմական համագործակցությունն ամենաբարձր մակարդակի վրա է:
«Մեր նպատակը հետևյալն է` զարգացնել մեր բանակը, իսկ այդ համատեքստում այսպիսի զորավարժությունները շատ կարևոր են: Այդ ժամանակ ուսումնասիրվում են տարբեր հարցեր, բարձր պատրաստվածության են բերվում զորքերը` ագրեսիայի դեպքում ճիշտ գործելու համար: Այնպես, որ հայկական բանակն ուժեղանում է` կանխելով ագրեսիան»,- ասել է նա: