Շատ հստակ գիտենք, որ մեր քայլը ճիշտ է, մեր շահերից բացարձակ չի բխում 180 աստիճանով շեղվել այս վիճակից. Գ. Մելիքյանը՝ ԵԱՏՄ-ից դուրս գալու մասին
Այսօր Հայաստանում ժողովրդի և քաղաքական կուսակցությունների բացարձակ մեծամասնությունը կողմ է ԵԱՏՄ-ին անդամակցության որոշմանը. համենայնդեպս, այդ հարցի հետ կապված միտինգներ, ցույցեր, կոշտ արտահայտություններ տարբեր ուժերի կողմից, այդ թվում՝ նաև ընդդիմադիր, չկան:
Այս մասին «Ազատություն» ռադիոկայանի եթերում ասել է Հայաստանի Հանրապետական կուսակցության պատգամավոր Գագիկ Մելիքյանը՝ անդրադառնալով ԵԱՏՄ-ից դուրս գալու ԵԼՔ-ի նախաձեռնությանը:
«Քննարկվում էր ընդամենը ժամանակավոր հանձնաժողով ստեղծելու հարցը, որը վերածվեց նաև հիմնավոր քննարկման, ոչ թե կրքոտ քննարկման: Համոզված եմ, որ այդ մեկուկես ժամվա քննարկումների ընթացքում թե՛ ժողովուրդը, թե՛ հիմնական քաղաքական ուժերը, քաղաքական օրակարգ ձևավորողները համոզվեցին, որ ճիշտ քաղաքական որոշում է կայացվել՝ անդամակցություն Եվրասիական տնտեսական միությանը: Եվ ընդամենն իրականացնել քննարկում՝ քննարկում իրականացնելու համար, այնքան էլ տեղին չէ»,-ասել է ՀՀԿ պատգամավորը:
Նա պարզաբանել է, որ քննարկումների ընթացքում հարցեր էին հնչում ընդդիմադիր քաղաքական գործիչների կողմից, որ իշխող քաղաքական ուժը վախենում է, չի ցանկանում մասնակցել քննարկումներին, պատճառներ չունի որոշում չկայացնելու, խնդիրներ է տեսնում այդ որոշումը քննարկելու:
«Ես կարծում եմ, որ դրանք ընդամենը վերացական արտահայտություններ էին, և հանձնաժողով ստեղծելու անհրաժեշտություն ուղղակի չկա, որովհետև գործող հիմնական հանձնաժողովը՝ ոչ ժամանակավորը, ցանկացած նմանատիպ հարց ի վիճակի է քննարկելու ցանկացած դեպքում: Անգամ Նիկոլ Փաշինյանը, երբ հայտարարեց, որ իրենք կկազմակերպեն կամ առաջարկությամբ հանդես կգան նաև լսումներ իրականացնելու, սա նույնպես ընդամենն իրենց վրա ուշադրություն սևեռելու նպատակ է հետապնդում»,-ասաց նա։
Գագիկ Մելիքյանի գնահատմամբ՝ դրա կարիքը և անհրաժեշտությունն ուղղակի չկա: Ասելը դեռևս չի նշանակում, որ հանձնաժողով ստեղծելու անհրաժեշտություն կա, խուսափելու որևէ խնդիր բացարձակապես չկա:
«Մենք շատ հստակ գիտենք, որ մեր կատարած քայլը ճիշտ է, 180 աստիճանով շեղվելն այս վիճակից, բացարձակ մեր շահերից չի բխում: Մենք կատարել ենք քայլ, որը բխելու է մեր ժողովրդի շահերից, մեր պետության շահերից, մեր անվտանգության շահերից, մեր տնտեսական առաջընթացի շահերից, անվտանգություն ասելով՝ ես առաջին հերթին նկատի ունեմ տնտեսական անվտանգությունը»,-վստահեցրել է պատգամավորը:
Նրա խոսքով՝ այս միությունը տնտեսական միություն է, ռազմաքաղաքական միություն չէ, ռազմաքաղաքական այլ միություն ունենք՝ ՀԱՊԿ-ի անդամ ենք:
Անդրադառնալով այն հարցին, որ երբ ԵԱՏՄ-ին միանալու հարցն էր քննարկվում, հանրապետականները խոսում էին նաև ռազմական անվտանգության մասին, Գագիկ Մելիքյանը պատասխանել է. «Իսկ ինչ է, ԼՂ հարցը հիմա մեզ համար առաջնային չէ՞, իհարկե, առաջնային է, բայց այս պարագայում շատ ավելի ճիշտ է այս միությանն անդամակցելը: Մենք անդամակցում ենք մի միության, որի անդամ երկրները՝ նաև մենք, բավականին երկար ճանապարհ ենք անցել միասին՝ 70 տարվա, 90 տարվա համատեղ ճանապարհ ենք անեցել: Վերջին հաշվով, մենք ինտեգրված ենք այդ միությանը: Մենք, մնալով այս կառույցում, տնտեսական հարց ենք լուծում»: