Սիրիայում և Իրաքում պարտությունից հետո ԻՊ-ի առաջնորդներն անցել են նոր ահաբեկչական ցանցի ստեղծման. ՌԴ ԱԴԾ
Սիրիայում և Իրաքում պարտությունից հետո «Իսլամական պետություն» ահաբեկչական խմբավորման առաջնորդներն անցել են Մերձավոր Արևելքի սահմաններից դուրս համաշխարհային նոր ահաբեկչական ցանցի ստեղծման: Այդ մասին հայտարարել է ՌԴ անվտանգության դաշնային ծառայության տնօրեն Ալեքսանդր Բորտնիկովը, հայտնում է «ՌԻԱ Նովոստի»-ն:
Այդ մասին նա ասել է հոկտեմբերի 4-5-ը Կրասնոդարում անցկացվող Անվտանգության դաշնային ծառայության գործընկեր երկրների հատուկ ծառայությունների ղեկավարների, անվտանգության մարմինների և իրավապահ մարմինների XVI խորհրդակցությունը բացելու ժամանակ:
Բորտնիկովի խոսքով՝ ահաբեկիչները զգալի կորուստներ են կրում սիրիական զորքերի և Ռուսաստանի օդատիեզերական ուժերի արդյունավետ գործողությունների շնորհիվ, ինչպես նաև Իրաքում կոալիցիոն ուժերի գործողությունների արդյունքում:
Խմբավորումները կորցրել են մեծ տարածքների և մի շարք նավթով հարուստ շրջանների նկատմամբ վերահսկողությունը: Կրճատվել է տնտեսական հիմքը, որը թույլ էր տալիս ֆինանսավորել ոչ միայն գրոհայինների խոշոր խմբերը, այլև Սիրիայի և Իրաքի սահմաններից դուրս նրանց աջակիցներին: Հետագա գործողությունների ռազմավարությունը փոխելու որոշման մասին են վկայում նրանց վերջին ահաբեկչությունների բնույթը և լայն աշխարհագրությունը:
Բորտնիկովը նշել է, որ ահաբեկիչները մարտահրավեր են նետել քաղաքակիրթ աշխարհին և ցանկանում են խուճապ սփռել աշխարհի տարբեր անկյուններում, վախեցնել իրենց դեմ պայքարող երկրներին: Նրանք նաև ցանկանում են աջակիցներին և հովանավորներին ցուցադրել «հետագա ակտիվ գործողությունների ունակությունը»: