Լսել եմ, որ մարդկանց մեջ այստեղ ներդրումներ անելու վախ կա. չեխական «Մարլենկա» ընկերության հայազգի ղեկավար
Չեխիայում հայտնի «Մարլենկա ինթերնեշնլ» ընկերության հայազգի ղեկավար Գևորգ Ավետիսյանի խոսքով՝ չեխական ընկերություններն առավել շատ հետաքրքրված են էներգետիկ ոլորտով: Նա Tert.am-ի հետ զրույցում նկատեց, թե որքան էլ նրանք այս ոլորտում մեծ երկրների շուկաներ են գրավել, պակաս հետաքրքրված չեն նաև փոքր երկրների շուկաներով:
«Ինձ թվում է՝ նրանց Հայաստանն էլ է հետաքրքրում: Այստեղ եկած բոլոր չեխական կազմակերպություններին էլ հետաքրքրում է նոր շուկաներ գրավելը, անկախ նրանից՝ երկիրը մեծ է, թե փոքր: Դա երկրին վարկանիշ է բերում, թեկուզ այս երկրից քիչ եկամուտ կա, մեծ երկրից՝ ավելի շատ: Իսկական բիզնեսը չի թերագնահատում փոքր շուկաները»,- ասաց նա:
Գևորգ Ավետիսյանն այստեղ է Հայաստանի զարգացման հիմնադրամի և Երևանում Չեխիայի Հանրապետության դեսպանության կազմակերպած «Հայաստան-Չեխիա» գործարար համաժողովին մասնակցելու համար:
Նա նկատեց, որ չեխ գործարարներն անգամ Աֆղանստանում, Սիրիայում, որտեղ մշտապես ավերածություններ են լինում, ներդրումներ անում են: «Հայկական շուկան ինձ ամենաշատը գրավում է նրանով պայմանավորված, որ սա իմ երկիրն է: Իմ սրտից բխող մի բան է, որ իմ հայրենիքում նույնպես իմ արտադրանքը լինի: Շատ ուրախ եմ, որ այսօր 3-4, բավականին հայտնի մեծ կազմակերպություններ հետաքրքրություն ցուցաբերեցին իմ արտադրանքի նկատմամբ»,- ասաց նա:
Գևորգ Ավետիսյանը նշեց, որ ինքն անձամբ դեռևս հայաստանյան շուկայում չի աշխատել, անմիջական առնչություն չի ունեցել ոլորտի խնդիրների հետ, միայն հեռվից լսել է, որ խնդիրներ կան: «Լսել եմ, որ մարդկանց մեջ վախ կա այստեղ ներդրումներ անելու: Ինձ թվում է՝ մարդիկ կան, որոնք խնդիրներ ունենալով բարձրաձայնել են, բայց մարդիկ էլ կան, որ ընդհանրապես խնդիր չեն էլ ունեցել այստեղ: Ես իմ մասին չեմ կարող ասել, բայց լսել եմ, որ անվստահություն կա այստեղ, վախ կա, որ եթե ներդնեն, խնդիրների առաջ են կանգնելու, հարկային խնդիրներ են ունենալու»,- ասաց նա:
Գևորգ Ավետիսյանը դրական հանգամանք համարեց նաև այն, որ Հայաստանը` ԵԱՏՄ անդամ լինելով, կարող է համագործակցել նաև Եվրամիության հետ. «Ես ուզում եմ հասկանալ՝ ճի՞շտ է դա, որ Հայաստանը կարող է Եվրամիության շուկա դուրս գալ՝ ԵԱՏՄ անդամ լինելով: Կարծեմ՝ չեն թողնի: Եթե թողնեին, շատ լավ կլիներ»,- ասաց նա: