Հայաստանի ընտրանու հարձակվող Ռուսլան Կորյան. Պարտությունից հետո ներողություն եմ խնդրել, հիմա մեզ պետք է երկրպագուների աջակցությունը
Աշխարհի 2018թ. առաջնության Եվրոպայի գոտու որակավորման փուլի վերջին` 10-րդ տուրում Հայաստանի հավաքականը կհյուրընկալվի Ղազախստանի ընտրանուն:
Հանդիպումը կկայանա վաղը` հոկտեմբերի 8-ին, Երևանի ժամանակով 20:00-ին:
Խաղից առաջ լրագրողների հարցերին պատասխանել է Հայաստանի ընտրանու հարձակվող Ռուսլան Կորյանը:
- Ռուսլան, ինչպե՞ս անցավ թռիչքը:
- Շատ լավ: Անձամբ ես ամբողջ ընթացքում քնած եմ եղել: Ինչ վերաբերում է վերականգնմանը, ապա կարող եմ ասել, որ Լեհաստանի ընտրանուց կրած պարտությունից հետո բոլորս մարտական ենք տրամադրված:
- Ի՞նչ տրամադրություն ունի թիմը Լեհաստանից կրած ջախջախիչ պարտությունից հետո: Հասցրե՞լ եք մոռանալ անհաջողությունը:
- Չեմ կարծում, որ հոգեբանորեն կարելի է այսքան շուտ մոռանալ այդ պարտությունը: Մեզ համար առաջիկա խաղը մեղքերը քավելու հրաշալի հնարավորություն է:
- Հայաստանը ինչ-որ բանով առավե՞լ է Ղազախստանից:
- Ըստ իս` հավասար թիմերի հակամարտություն է: Խաղերից ելնելով` հնարավոր է, որ Ղազախստանին ինչ-որ տեղ վարպետություն է պակասում:
- Մխիթարյանի ներկայությունը խաղադաշտում մե՞ծ առավելություն է Հայաստանի ընտրանու համար:
- Միանշանակ, նա մեր առաջատարն է: Միաժամանակ, չի կարելի հույսը դնել միայն նրա վրա: Ֆուտբոլը թիմային խաղ է:
- Խաղը կկայանա արհեստական խաղադաշտում: Ինչպե՞ս դա կազդի Հայաստանի ընտրանու խաղի վրա:
- Անձամբ ինձ համար` դա նորություն չէ: Քանի որ մեր առաջնությունում (Ռուսաստան,- խմբ.) մարզադաշտերի կեսն արհեստական է:
- Ոչ-ոքին ձեռնտո՞ւ հաշիվ է ձեզ համար:
- Ոչ:
- Ի՞նչ կասեք հայ երկրպագուներին, որոնք հիասթափված են Լեհաստանից կրած պարտությունից:
- Լեհերի հետ խաղից հետո ես արդեն ներողություն եմ խնդրել երկրպագուներից: Հիմա ցանկանում եմ, որ նրանք մեզ շարունակեն աջակցել: Դա շատ կարևոր է մեզ համար: