Գնում ենք ճիշտ ուղղությամբ` արտահանման ծավալներն աճում են, ԵԱՏՄ արտահանում ենք պատրաստի արտադրանք, իսկ ԵՄ` հումք. Էմիլ Տարասյան
Հայաստանից Եվրասիական տնտեսական միության-անդամ պետություններ կատարվող արտահանման ծավալները մեծացել են: Tert.am-ի հետ զրույցում այս մասին ասաց ՀՀ տնտեսական զարգացման և ներդրումների փոխնախարար Էմիլ Տարասյանը: Վերջինս նշեց, որ 2017թ.-ին արտահանման ծավալները դեպի ԵԱՏՄ երկրներ ավելացել են 26 տոկոսով:
Հարցին՝ ինչի՞ հաշվին է մեծացել արտահանումը, ո՞ր ոլորտների, Էմիլ Տարասյանն այսպես պատասխանեց. «Մենք ԵԱՏՄ ենք արտահանում հիմնականում պատրաստի արտադրանք, իսկ Եվրամիություն, օրինակ, արտահանվում է հումքը: Արտահանման ծավալների աճի վրա ազդել են մի շարք գործոններ. տարադրամի փոխարժեքների հետ կապված իրավիճակը կայունացավ, ռիսկեր կային, որոնք նվազեցվեցին, ընթացակարգեր հստակեցվեցին, տեխնիկական խոչընդոտներ վերացան, բիզնեսը սովորեց, գործընկերներ ձեռքբերեց և այլն»:
Է. Տարասյանն ասաց, որ պետական քաղաքականությունը ևս նպաստեց արտահանման ծավալների մեծացմանը:
Հարցին, թե չիրացված ի՞նչ պոտենցիալի մասին էր խոսում Հայաստանի վարչապետը, ի՞նչն է խանգարում իրացնել այդ պոտենցիալը, փոխնախարարը պատասխանեց, որ ժամանակի հարց է, ամբողջ պոտենցիալը իրացնելու համար պետք է ոչ միայն պետական, այլև՝ մասնավոր հատվածի աշխատանք:
«Պետք է տանել գործընկերների հայթայթման, շուկաների վրա ուղղորդված աշխատանք, որը մասնավոր հատվածի հետ համագործակցությամբ պետք է արվի: Սա երկարատև աշխատանք է, պետք է շուկան ու սպառողը սովորեն այդ արտադրանքին: Ամեն դեպքում դինամիկան ցույց է տալիս, որ գնում ենք ճիշտ ուղղությամբ, և արտահանման ծավալները գնալով կաճեն»,- ասաց Է. Տարասյանը:
Ըստ նրա՝ ԵԱՏՄ շուկայում ռեալիզացվելու մեծ հնարավորություն ունեն թեթև արդյունաբերությունը, դեղագործությունը: Հարցին, թե այս տարվա արտահանման 26 տոկոսով ավելացած ծավալի ո՞ր մասն է կազմում Ռուսաստանը, Էմիլ Տարասյանը պատասխանեց, որ Ռուսաստանը ոչ թե տոկոսային, այլ ծավալային, արժեքային առումով է գերակշիռ մասը կազմում:
«Տոկոսային առումով Բելառուս, Ղազախստան, Ղրղըզստան ուղղություններով արտահանումը չի զիջում, իսկ դրամային արժեքով եթե դիտարկենք հարցը, ապա Ռուսաստանը գերակշռում է, որովհետև սպառման ծավալը մեծ է, շուկան մեծ է: Ղազախստանն, օրինակ, ինքնաբավ է, իրացնում է իր սեփական արտադրանքը: Մենք զարգացնում ենք մեր արտահանումն այն ուղղություններով, որտեղ այն կարող է ամենից շատ վաճառվել»,- նշեց Էմիլ Տարասյանը:
Փոխնախարարը նշեց, որ Հայաստանում զարգացած է տեխնոլոգիաների, Տեղեկատվական տեխնոլոգիաների ոլորտը, և Հայաստանը պետք է այլ պետությունների օրակարգեր մտնի ՏՏ ու «ՀայՏեք» ոլորտներով:
«Այս ոլորտը բեռնափոխադրման հետ կապված չէ, մենք կունենանք մեծ առավելություններ, որովհետև շուկան էլ մեծ է, պահանջարկն էլ, օգտագործվում է մարդկային ռեսուրս, քիչ կապ կա հումքի ներկրման հետ, և մենք այս ոլորտում կարող ենք լուրջ մրցակից լինել անգամ համաշխարհային մակարդակում: Մշակվում է ինովացիոն քաղաքականություն, որը կբերի նոր ուղղությունների զարգացմանն ու ստեղծմանը: Այս հնարավորությունից պետք է օգտվենք»,- ընդգծեց Էմիլ Տարասյանը: