Եթե ԵՄ-ն ՀՀ-ին մարիխուանայի օրինականացման «տնային աշխատանք» տար, ապա նման թույլտվություններ կլինեին նաև ԵՄ երկրներում. Թևան Պողոսյան
Եթե ԵՄ-ն մարիխուանայի օրինականացմամբ «տնային աշխատանք» տար, ապա նման թույլտվություններ կլինեին նաև ԵՄ երկրներում, բայց Եվրոպան երբևէ Հայաստանի առաջ չի դրել նման հարց, առավել ևս վիզաներն ազատականացնելու պահանջով: Tert.am-ի հետ զրույցում հայտնեց ԱԺ նախկին պատգամավոր, Մարդկային զարգացման միջազգային կենտրոնի գործադիր տնօրեն Թևան Պողոսյանը:
Նա նշեց, որ նման հասկացություն՝ «մարիխուանա օգտագործելու ազատություն», աշխարհում գոյություն չունի։
«Մարիխուանա օգտագործելը մեր օրենսդրությամբ արգելված է, և միակ դեպքը, որ լսել եմ և որը կարող է օրենքով խնդիր լինել, դեղահաբերն են, որոնց մեջ թմրանյութեր կան՝ որպես ցավազրկող։ Բայց դրանք դուրս են գրվում բժիշկների կողմից՝ շատ ծանր հիվանդների համար»,-ասաց նա:
Հիշեցնենք, որ «Հրապարակ» օրաթերթն այսօր գրել էր, որ վերջերս ԵՄ հայաստանյան պատվիրակության ղեկավար Պյոտր Սվիտալսկին խոսել էր ՀՀ իշխանությունների «տնային աշխատանքից», որ նրանք պետք է կատարեն ԵՄ երկրների հետ վիզայի ազատականացման հետ կապված:
«Եվ պարզվում է` «տնայիններից» մեկն անչափ «կայֆոտ» է. ԵՄ-ի հետ վիզայի ազատականացման նախապայմաններից մեկն էլ մարիխուանա վաճառելու-«քաշելու» թույլտվությանն է վերաբերում»,-գրել էր թերթը:
Թևան Պողոսյանն այս կապակցությամբ հավելեց նաև, որ եթե նման պահանջ լիներ, ապա ԵՄ երկրներում ևս նման թույլտվություններ կլինեին, բայց նման թույլատվություն գործում է միայն Նիդերլանդներում: