iPad Pro-ն դեմքով կճանաչի օգտատիրոջը. The Verge
Դիմաճանաչողական գործառույթով (Face ID) համալրված առաջին iPhone-ը (iPhone X) դեռևս չի հայտնվել վաճառքում, սակայն վիրտուալ տիրույթում արդեն տեղեկություն է տարածվել առ այն, որ նոր iPad Pro-ն ևս կկարողանա օգտատիրոջը դեմքով ճանաչել:
Ինչպես նշում է The Verge-ը, KGI Securities ընկերության վերլուծաբան Մին Չի Կուոն կանխատեսել է, որ հաջորդ տարի ներկայացվելիք iPad Pro-ի նոր մոդելները կունենան գերժամանակակից տեսախցիկներ ու Face ID գործառույթը:
Հիշեցնենք, որ iPhone X-ը, որը վաճառքում կհայտնվի նոյեմբերի 3-ից, ընկերության՝ դիմաճանաչողական գործառույթ ունեցող առաջին արտադրանք է: Այն ստեղծելու համար մասնագետները հեռախոսի վրա աշխատել են 5 տարի՝ պատրաստելով մի քանի նախնական օրինակ:
iPhone X-ն ունի 5.8 դյույմ անկյունագծով էկրան, ապակյա հետին պանել, անլար լիցքավորման հնարավորություն, դիմաճանաչողական գործառույթ: Հեռախոսի սովորական տարբերակը (64Գբ) արժե 999, իսկ առավել հզորը (256Գբ)՝ 1.149 դոլար: