Տեխնիկական հագեցվածության ցածր մակարդակ, մատչելի ֆինանսական ռեսուրսների բացակայություն. նախարարը թվարկեց գյուղատնտեսության խնդիրները
Գյուղատնտեսության ոլորտում լուծում պահանջող խնդիրները շատ են, դրանք լուծելով կհասնենք նրան, որ գյուղատնտեսությունը կլինի մրցունակ, գրավիչ, ինդուստրիալ: Այսօր ամփոփիչ ասուլիսում նման հայտարարություն արեց ՀՀ գյուղատնտեսության նախարար Իգնատի Առաքելյանը:
Նրա կարծիքով՝ առկա խնդիրների լուծման պարագայում կստեղծվի հնարավորություն, որ գյուղատնտեսությամբ զբաղվողներն ապահովեն իրենց ավելի լավ կենցաղը, այլ ոչ թե միայն առօրյա հարցեր կլուծեն:
«Վեր հանած խնդիրներն են՝ տեխնիկական հագեցվածության ցածր մակարդակ, չունենք մատչելի ֆինանսական ռեսուրսներ, ոռոգման համակարգի ոչ լիարժեք ապահովվածություն, բնակլիմայական աղետներից ապահովված չենք, փոխհատուցումը նույնպես լավ չէ, կրթական ու խորհրդատվական համակարգը թույլ է: Ինչպես նաև մեր գյուղատնտեսությունն ավանդական է, սակայն աշխարհում ավելի բարձր եկամտաբերություն ունեցող մշակաբույսեր կան, որ ՀՀ-ում չի կիրառվում: Խնդիր կա իրացման գների և գյուղացիների վճարումների հետ կապված, ինչը կրկին ոչ հետաքրքիր է դարձնում գյուղատնտեսությունը»,- ասաց Առաքելյանը:
Նախարարը խնդիրների հետ նշեց նաև գյուղատնտեսական հողերի օգտագործելության ճիշտ գնահատականի բացակայությունը, ինչպես նաև ասաց, որ օրենսդրական բացեր կան: Նրա խոսքով՝ այս խնդիրների լուծումը հնարավոր է, ավելին՝ կարգավորմանը միտված քայլեր են ձեռնարկել: Առաքելյանը տեղեկացրեց, որ գյուղտեխնիկայի խնդրի լուծման համար նոր ծրագիր կա՝ լիզինգով տրամադրում, որն իրականացվում է նախարարության տնտեսած գումարների հաշվին:
«Մենք ապահովել են և՛ բյուջեով նախատեսված ծրագրերը, և՛ զուգահեռ նոր 3 ծրագիր ենք սկսել: Լիզինգի ծրագրով մենք այս տարի 132 միավոր գյուղտեխնիկա ենք տրամադրել, հիմնվել է գյուղտեխնիկայի մեկ կայան: Հայտարարել ենք պետական աջակցության գյուղտեխնիկայի կայանի հիմնումը, որի մրցույթ ավարտվել է. մի քանի ամսից ՀՀ-ում կունենանք գյուղտեխնիկան, որը կաշխատի գարնանային աշխատանքների հետ: Համաշխարհային բանկի ծրագիր կա՝ արոտների ջրային համակարգի արդիականացման, անասնապահական կոոպերատիվների հիմնման և աջակցման ծրագիրը: Այս ծրագրով մինչև տարվա վերջ կտրամադրենք 120 միավոր գյուղտեխնիկա՝ 550 մլն դրամի: Այս ծրագրով կոոպերատիվը վճարում է տեխնիկայի 20 տոկոսի գումարը, իսկ 80 տոկոսը պետություն է տրամադրում»,- շարունակեց Իգնատի Առաքելյանը:
Ֆինանսական աջակցության մասով Առաքելյանն առանձնացրեց մթերման համար տրամադրվող 3 տոկոսանոց վարկերը, գյուղատնտեսության զարգացման ուղղված ծրագրերը և այն: Առաքելյանը նշեց, որ 2018 թվականին կսկսի կաթիլային համակարգով ոռոգումը՝ 2 տոկոսանոց վարկերով, 12 տոկոսը կսուբսիդավորի պետությունը, կարկտապաշտպանության համակարգեր տեղադրելու վարկերը նույնպես կլինեն 2 տոկոսանոց վարկով, ինտենսիվ այգիները՝ 5 տոկոս վարկով: