Վանաձորի զորամասերում զանգվածային կրճատումների մասին լուրն ընդամենը բամբասանք է. Արծրուն Հովհաննիսյան
ՀՀ զինված ուժերի մարտունակությունը պահելու համար միշտ էլ եղել են ԶՈւ հաստիքացուցակների փոքրացումներ, այդ թվում՝ ռոտացիոն:
Tert.am-ի հետ զրույցում արձագանքելով Վանաձորի զորամասերում զանգվածային կրճատումների մասին «Հայկական ժամանակ» օրաթերթի հրապարակմանը՝ այս մասին նշեց ՀՀ պաշտպանության նախարարի խոսնակ Արծրուն Հովհաննիսյանը:
Նա նշեց, որ հաստիքացուցակների փոքրացումների մասին իր վերջին ասուլիսի ժամանակ ասել է ՀՀ պաշտպանության նախարար Վիգեն Սարգսյանը, սակայն ասել, որ զանգվածային կրճատումներ կան, այն էլ՝ զորամասային օղակում, անհեթեթություն է:
«Զորամասը այնպիսի կառուցվածք չունի, որ ավելորդ մարդիկ լինեն, այն էլ՝ այդ քանակի: Զանգվածային կրճատման մասին խոսք լինել չի կարող, այն էլ՝ զորամասերում: Դա ընդամենը սովորական բամբասանք է՝ խոսակցություններ կան, ասում են և այլն»,-ասաց Հովհաննիսյանը: