Անցկացվեց «Փոխգործակցություն 2017» համատեղ զորավարժության փուլերից մեկը` մարտական կրակի կիրառմամբ (լուսանկարներ)
Այսօր «Ալագյազ» զորավարժարանում խաղարկվեց ՀԱՊԿ օպերատիվ արձագանքման հավաքական ուժերի համակազմերի ու ՀՀ ԶՈՒ և ՌԴ ԶՈՒ զորքերի (ուժերի) միացյալ խմբավորման ստորաբաժանումների հետ անցկացվող «Փոխգործակցություն 2017» համատեղ զորավարժության փուլերից մեկը` մարտական կրակի կիրառմամբ:
ՌԴ Զինված ուժերի Հարավային ռազմական օկրուգի հրամանատար, գեներալ-գնդապետ Ալեքսանդր Դվորնիկովը լրագրողների հետ զրույցում ասաց, որ օպերատիվ արձագանքման հավաքական ուժերի մասնակցությամբ շարունակվում են զորավարժությունները, որոնք ընդհանուր կոչվում են «Մարտական եղբայրություն 2017»: «Հայաստանում անցկացվում է դրա փուլերից մեկը, որը կոչվում է «Փոխգործակցություն 2017» ու այս անվանումը արդեն խոսում է իր մասին»,-ասաց նա և նշեց, որ նախորդ երկու օրերին անցկացվել է զորավարժությունների պլանավորման փուլը, որի ընթացքում հստակեցվել են զորքերի առջև դրված խնդիրները, իսկ այսօրվանից սկսվել է գործնական փուլը:
«Այսօր դուք տեսաք փոխգործակցություն, և բոլոր ստորաբաժանումների միասնական գործունեություն, որոնք իրականացնում էին ՀԱՊԿ անդամ սուվերեն պետության սահմանների պահպանություն: Պայքարն ընթանում էր լեռնային պայմաններում` ապօրինի զինված խմբավորումների դեմ: Բոլորս հասկանում ենք, որ մեր զինված ուժերն իրենց երկրներում պատրաստ են իրականացնել խնդիրներ, իսկ ահա փոխգործակցությունը մշակվում է հենց այսօր` այստեղ և դեռ շարունակվելու է առաջիկա օրերին ՀՀ զորավարժարաններում»,-ասաց նա:
ՀՀ ԶՈւ գլխավոր շտաբի օպերատիվ վարչության պետ Գեներալ-մայոր Տիրան Խաչատրյանը նշեց, որ Զորավարժությունների պլանի համաձայն կրակային փուլից առաջ իրականացվեցին հրամանաշտաբային զորախաղեր, որից հետո կազմակերպվեցին ուժերի և միջոցների հետ ներդաշնակման պարապմունքներ: «Բուն զորավարժությունների ընթացքում ներգրավվեցին բոլոր այն ուժերն ու միջոցները, որոնք` համաձայն գործող պայմանագրերի, պետք է ընդգրկված լինեն տարբեր երկրների կամ տարբեր իրավիճակների ու սպառնալիքների ժամանակ անհրաժեշտ գործողություններում»,-ասաց նա:
Տիրան Խաչատրյանը տեղեկացրեց, որ քանի որ ՀՀ տարածաշրջանում են իրականացվում զորավարժությունները, ընդգրկված էին ոչ միայն համագործակցության անկախ պետությունների կազմում ընդգրկված զորախմբերն այլ նաև 102-րդ բազայի զորախումբը, որը միացյալ խմբավորման մասն է կազմում: «Ընդգրկված սպառազինությունն ու տեխնիկան, բնականաբար, հաստիքային է, ինչը որ այսօր ծառայության ընթացքում և պատրաստության, իրենց խնդիրների կատարման համար պետք է ներգրավված լինեին: Ըստ իրադրության զարգացման և գործող պայմանների դրված էր «Ալագյազ» զորավարժարանում գործող ստորաբաժանումների համար խնդիր, որը բարեհաջող կերպով ղեկավարության կողմից պլանավորվեց և զորքի կողմից հասցվեց իր ավարտին»,-ասաց նա:
Նա բարձր գնահատեց իրականացված գործողությունը և նշեց, որ վերջնական գնահատականը կորոշվի կրակային խոցման արդյունքների հաշվարկից հետո: «Մարտավարական գործողությունները ու ընդհանուր խնդրի կատարումը լավ եմ գնահատում»,-ասաց նա:
