Համայնքները ցանկացած նախագիծ հաստատելիս պետք է ֆիքսեն կտուրների գույները և ֆասադների ոճային լուծումները. Նարեկ Սարգսյան
Այսօր կառավարության նիստին Քաղաքաշինության կոմիտեի նախագահ Նարեկ Սարգսյանը վարչապետի կողմից տրված՝ տանիքների գունային լուծումների վերաբերյալ հանձնարականի վերաբերյալ որոշման նախագիծ ներկայացրեց:
Նա նշեց, որ մի քիչ ավելի ընդլայնված են մոտեցել այս հարցին և ոչ միայն կտուրների գունային լուծումների վերաբերյալ, այլ առհասարակ միջավայրից թելադրվող՝ ճակատների, ֆասադների ոճային, դեկորային լուծումների վերաբերյալ առաջարկ են ներկայացրել:
«Այս քայլից հետո տեղական ինքնակառավարման համայնքները կտան իրենց առաջարկները: Մինչև տարվա վերջ քաղաքաշինական հատուկ կարգավորման բոլոր տարածքներում, հայտնի քաղաքներում և մայրուղային հարակից գյուղերում մենք կհաստատենք երաշխավորված գունային լուծումների ռեեստրը, տարբերակները կտանք: Մի քիչ զգույշ ենք լինում գույները ֆիքսելուց հիմա, դա կանենք մոտակա երկու ամիսների ընթացքում, որովհետև ցանկանում ենք ուսումնասիրել շուկան, որ հանկարծ տնտեսվարողների արտադրանքի գույների հետ կապված մենք թելադրող իրավիճակում չհայտնվենք, բայց մինչև տարվա վերջ մենք այս խնդիրը կփակենք»,-ասաց նա:
Այսպիսով` Նարեկ Սարգսյանն ասաց, որ համայնքները ցանկացած նախագիծ հաստատելիս պետք է պարտադիր ֆիքսեն միջավայրից թելադրվող կտուրների գույները և ֆասադների ոճային լուծումները:
Նախագծի վերաբերյալ վարչապետ Կարեն Կարապետյանը նշեց. «Պարո՛ն Սարգսյան, մենք այդ խաղի կանոնները ձևակերպելու ժամանակ հաշվի ենք առնում չէ՞, որ մենք ներդրողին, շինարարին չսահմանափակենք, հստակ ձևակերպենք, որ տեղերում վարչարարության ավել առիթ չտանք»,-ասաց նա, իսկ նախարարը պատասխանեց՝ միանշանակ:
Վարչապետը կոչ արեց հատուկ դրան ուշադրություն դարձնել, որ դա ինքնարժեքի թանկացման չբերի, ազատության աստիճանը չսահմանափակի: