Այդ բառն Իգիթյանի բառապաշարի բաղկացուցիչ մասն է, և կարելի է ենթադրել, թե նա ինչպես է խոսում իր ընտանիքի անդամների հետ. Մարինա Խաչատրյան
Երևանի ավագանու նիստերը վերածվում են գավառական շուկայի: Երևանի ավագանու «Երկիր Ծիրանի» խմբակցության անդամ Մարինա Խաչատրյանն այս մասին ասել է «Ազատություն» ռադիոկայանի եթերում:
«Այստեղ կա՛մ առուծախի հարցեր են քննարկվում, կա՛մ նվիրատվության հարցեր, կա՛մ ինչ-որ պարգևներ տալու հարցեր: Որևէ ռեալ հարց, որ վերաբերի Երևան քաղաքին, նրա բնակիչներին, քաղաքացիների շահերին, այս բազմաթիվ նիստերի ընթացքում այդպես էլ չեն քննարկվում»,-ասել է Երևանի ավագանու «Երկիր Ծիրանի»-ի անդամը:
Ինչ վերաբերում է նիստի ընթացքում ավագանու անդամների պահվածքին, ապա նա նշել է, որ մինչ այս նման դիմադրության նրանք չէին հանդիպել, այսինքն՝ բերվել էր օրակարգը, որը շատ արագ ընդունվել էր, և այսքան երկար չէին տևել նիստերը: Այդպիսի քննարկումներ, հարցադրումներ, ելույթներ չէին եղել:
Հիշեցնենք, որ Երևանի ավագանու հերթական նիստի ժամանակ «Երկիր Ծիրանի» խմբակցության անդամները դժգոհել էին պատվավոր քաղաքացու կոչման համար առաջադրված անձանց ընտրությունից: ՀՀԿ խմբակցության անդամները նրանց սաստել էին տեղերից, այդ թվում էր եղել նաև ճարտարապետ Լևոն Իգիթյանը, ով անպարկեշտ արտահայտություն էր արել «Երկիր Ծիրանի»-ի անդամների հասցեին:
«Բնականաբար, հասկանալի է, որ մարդիկ կան, ովքեր նյարդայնանում են, որ ստիպված պետք է աշխատեն, մարդիկ կան, ովքեր իրենց չեն կարողանում տիրապետել, մարդիկ կան, ովքեր իրենց ցույց տալու կարիք ունեն, դիվիդենտներ հավաքելու: Ըստ լուրերի՝ նաև դրա դիմաց գումար են վաստակում կամ ինչ-որ ծառայություններ են ստանում: Այդպիսով՝ մեր ժողովուրդն այլևս հավանաբար չի զարմանում ներկայիս ավագանու շատ անդամների վարքագծից»,-ասաց նա։
Մարինա Խաչատրյանը տեղեկացրել է, որ տարիներ շարունակ այնտեղ գործում է էլեկտրոնային քվեարկության համակարգ, գրանցման համակարգ, բայց ինչքան էլ իրենք բարձրաձայնել են, միևնույն է, այդ քվեարկության և գրանցման համակարգը մինչ օրս չի գործում: Նրա խոսքով՝ երբ «Երկիր Ծիրանի» խմբակցության անդամները հարց են ուղղում, ստանում են «շուտով կգործի» պատասխանը:
Անդրադառնալով Երևանի ավագանու ՀՀԿ անդամ Լևոն Իգիթյանի հետ կապված միջադեպին, «Երկիր Ծիրանի»-ի անդամն ասել է. «Նիստի ժամանակ, մենք դա չէինք կարող լսել, նա, հավանաբար այնքան խիզախություն չուներ, որ այդպիսի բան մեզ ասեր: Ես ուզում եմ հավատալ, որ Լևոն Իգիթյանը մեզ վիրավորելու և նման արտահայտություն ուղղելու ցանկություն չուներ: Նա դա անում էր իր ղեկավարների, իր վերնախավի մոտ երևալու և որոշակի ծառայություններ, արտոնություններ կամ գումար ստանալու համար: Ես նրան խղճում եմ, նա խղճուկ մարդ է, որովհետև տղամարդը, իսկական տղամարդը նման արտահայտություններ իրեն թույլ չի տա»:
Մարինա Խաչատրյանի խոսքով՝ եթե նույնիսկ Լևոն Իգիթյանն ասել է, պարտավոր է հիմնավորումներ ներկայացնել և չհրաժարվել իր խոսքերից:
«Եթե Լևոն Իգիթյանն ասել է, որ պարզապես իր զրուցակցի հետ էր խոսում, ապա եկեք փաստենք, որ նա եկել էր աշխատելու և փաստացի իր աշխատանքը չի կատարում, աշխատանքի ժամին այլ բաներով է զբաղված: Մյուս կողմից հասկանալի է դառնում, որ Իգիթյանի բառապաշարի բաղկացուցիչ մասն է կազմում այդ բառը, և կարելի է ենթադրել, թե նա ինչպես է խոսում իրեն շրջապատող մարդկանց հետ, իր ընտանիքի անդամների հետ: Մի խոսք կա, որին ես միշտ հետևում եմ: Ասում են՝ մի իջիր հակառակորդիդ մակարդակին, քանի որ նա այդ մակարդակում պրոֆեսիոնալ է և քեզ կարող է այնտեղ ոչնչացնել»,-ասաց ԵԾ անդամը։