Նրանք ցանկանում են օղակի մեջ վերցնել Թուրքիան և սանձել՝ ինչպես եղունգները քաշած առյուծի. Էրդողան
Թուրքիայի նախագահ Ռեջեփ Թայիփ Էրդողանը, մեկնաբանելով թուրք-ամերիկյան դիվանագիտական ճգնաժամը, հայտարարել է, որ Արևմուտքը սովոր չէ տեսնել նոր ու հզոր Թուրքիա, ինչի պատճառով էլ ցանկանում է «սանձել» իրենց: Այս մասին գրում է թուրքական «Միլլիյեթ» պարբերականը:
«Նրանք ցանկանում են օղակի մեջ վերցնել Թուրքիան և սանձել՝ ինչպես եղունգները քաշած առյուծի», - ասել է Էրդողանը:
Չնայած ԱՄՆ-ի հնչեցրած պատասխանին առ այն, որ Թուրքիայի քաղաքացիներին վիզաների տրամադրման դադարեցումը ոչ թե Անկարայում ԱՄՆ դեսպանի, այլ Սպիտակ տան ու ԱՄՆ կառավարության որոշումն էր, Էրդողանը շարունակել է պնդել, որ թուրք-ամերիկյան վիզային ճգնաժամի մեղավորն ԱՄՆ դեսպան Ջոն Բասն է:
Հիշեցնենք, որ անցած շաբաթ ԱՄՆ դիվանագիտական առաքելության աշխատակիցը ձերբակալվել էր Ստամբուլում՝ անցյալ տարի տապալված հեղաշրջման համար մեղադրվող ընդդիմադիր իսլամիստ քարոզիչ Ֆեթհուլլահ Գյուլենի կազմակերպության հետ կապերի մեղադրանքով: Դրանից հետո Թուրքիայում ԱՄՆ դեսպանատունը հայտնել է Թուրքիայի քաղաքացիներին վիզաների տրամադրման դադարեցման մասին: Թուրքիան նույնպես դադարեցրել է ԱՄՆ քաղաքացիների համար մուտքի վիզաների տրամադրումը: